ଆଖିରେ ଆଖିରେ

ଆଖୁ କିଣୁଥିଲି ଆଖୁଆପଦାର ଛକରେ

ଆଖି ପଡିଗଲା ଯାଉଥିଲୁ ତୁହି ବାଟରେ । [୧]

ଆଖି ଲାଖିଗଲା ଆଖେଇକି ତୋ ରୂପରେ

ଆଖି ମାରିଦେଲି ଇଶାରା କରି ମୋ ଆଖିରେ। [୨]

ଆଖି କହିଦେଲା ମନ କଥା ମୋର ଅଚିରେ

ଆଖିରେ ପଢି ତୁ ଆଖି ଝୁକେଇଲୁ ସଖୀରେ। [୩]

ଆଖି ତୋ କହିଲା ତୁ ରହିବୁ ମୋ ସାଥିରେ

ଆଖି ନାଚିଗଲା ମନ ଭରା ମନ ଖୁସିରେ। [୪]

ଆଖି ପକେଇଲା କିଏସେ ମୋ ମିଠା ପେରେମେ

ଆଖି ଭସେଇକି ତୁଉ ଦୂର ହେଲୁ ଭରମେ । [୫]

ଆଖି ବୁଲେଇଲେ ତୁ ଚାରିଆଡେ ଦିଶୁରେ

ଆଖି କୋଣେ ଆସି ମୁକୁତା ବିନ୍ଦୁରେ ବସୁରେ। [୬]

ଆଖିରେ ନାଚୁଛି ମିଠା ମିଠା ସେଇ ସ୍ମୃତିରେ

ଆଖିରେ ରହିଛୁ ରହିବୁ ତୁ ମନ ମୋତିରେ। [୭]

ଆଖିର ଅକୁହା ଭାଷା ତୋ ହୃଦ କି ବୁଝିବ

ଆଖି ପାଉନି ଏ ସମୟ କି ସାକ୍ଷୀ ରହିବ। [୮]

ଆଖି ବୁଜିଦେବା ସଭିଏଁ ତ କାଳ ସୁଅରେ

ଆଖିରେ ମୋ ଆଖି ମିଶାଇ ତୁ ସତ କହରେ। [୯]