ଆଖିରେ ଆଖିଏ ସ୍ୱପ୍ନ
ଆଖିରେ ଆଖିଏ ସ୍ୱପ୍ନ
କୁଆଁର ପୁନେଇଁ ଚାନ୍ଦ ପୂଜା ସାରି
ଚାଙ୍ଗୁଡିରେ ଧରି ଶୀତ
ଧିର ପଦଚାଳି ଆସୁଥିଲା ପ୍ରିୟା
ମନେମନେ ହେଇ ପ୍ରୀତ ।
ମନତଳେ ଥିଲା କେତେ ପ୍ରଶ୍ନବାଚୀ
ଉତ୍ତର ଖୋଜିଲା ମନେ
ନିଜେ ହଜିଗଲା ନିଜ ଭିତରେ ସେ
ଭାବନାର ପ୍ରତିକ୍ଷଣେ ।
ସାଗର ସୈକତେ ଦେଖିଲା ନିଜକୁ
ଆଖିରେ ବୋଳିଲା ସ୍ୱପ୍ନ
ପ୍ରବାଳ ଦୀପରେ ଘୁରି ବୁଲୁଥିଲା
ମିଳନ ପିପାସୁ ମନ ।
ହିସାବର ଫର୍ଦ୍ଦ ଲମ୍ବି ଯାଉଥିଲା
ଗାଢ ହେଉଥିଲା ଗାତି
ଜ୍ୟୋତ୍ସ୍ନା ପଖାଳିଲା ତୋଫାଦେହ ତାର
ମନ ପାଶୋରିଲା ଭୀତି ।
ପ୍ରିୟତମ ବାହୁ ବନ୍ଧନ ଖୋଜିଲା
ଚୁମା ଖୋଜିହେଲା ଓଠ
କୂଳ ଲଙ୍ଘିଗଲା ଜୁଆରିଆ ମନ
ଆରମ୍ଭିଲା ପ୍ରେମ ପାଠ ।
ଦେହର ଦହନ ଶାନ୍ତ ହେବ ତାର
ପ୍ରିୟର ପରଶ ପାଇ
ଶାନ୍ତ କରିବାକୁ ଦେହର ଦହନ
ମିଳନରେ ହେଲା ବାଇ ।