ଆଖିର ଲୁହରେ କିଛି ହୃଦୟର କଥା..

ହୃଦୟର କଥା ଅନ୍ତର ବେଦନା

         ତୁମକୁ ପାରେ ମୁଁ କହି,

ଲୁଚି ଲୁଚି କାନ୍ଦେ ତୁମ ସମ୍ମଖରେ

           ଆଖିରୁ ଲୁହ ଝରାଇ ।

ଜଗତଜନେ କି' ବୁଝିବେ ମୋ ଦୁଃଖ,

          ଦେଖିବେ କିଆଁ ମୋ ଲୁହ !,

ଆପଣାର ବୋଲି ତୁମ ପାଶେ କାନ୍ଦେ

            ହୃଦରୁ ଉଠଇ କୋହ ।

ମୋର ଦୁଃଖ ଯେବେ ତୁମକୁ ମୁଁ କହେ

         କାନ୍ଦିପାରେ ମନବୋଧି,

ବିସ୍ତାରି ପ୍ରଲମ୍ବ ଶ୍ରୀଭୁଜରେ ମୋତେ

          ତୁମ ବକ୍ଷେ ଦିଅ ବାନ୍ଧି ।

ଅବ୍ୟକ୍ତ ପୁଲକ ଅମୃତର ଧାରା

       ଖେଳିଯାଏ ମୋ ଶରୀରେ,

ତପ୍ତପ୍ରାଣ ମୋର ଶୀତଳେଇ ଯାଏ

          ତୁମ ସ୍ନେହ ପରଶରେ ।

ଶ୍ରୀହସ୍ତରେ ଲୁହ ଦେଉଥାଅ ପୋଛି

       କରି ମୋତେ କୋଳାଗ୍ରତ,

ତୁମରି ପ୍ରେମର ସିନ୍ଧୁ ସୁଗଭୀରେ

           ହୁଏ ମୁହିଁ ଦ୍ରବିଭୁତ ।

      

ମୁଁ ଯେବେ କାନ୍ଦଇ ତୁମେ କାନ୍ଦୁଥାଅ

         ଦୁଃଖେ ହୋଇ ସମଭାଗୀ,

ଲୁହ ଝରୁଥାଇ ତୁମ ନୟନରୁ

          ମୋ ଆଖିର ଲୁହ ଦେଖି ।

ମୁହିଁ ସିନା କାନ୍ଦେ ନିଜ ପାଇଁ ନାଥ,

         ତୁମେ କାନ୍ଦ ମୋର ପାଇଁ,

ତୁମପରି ଆନ ଦ୍ଵିତୀୟ ଦରଦୀ

          ଜଗତେ ମୁଁ ଦେଖି ନାହିଁ ।

ଏଡ଼େ ସ୍ୱାର୍ଥପର ଅଟଇ ମୁଁ ପ୍ରଭୁ

      ମୋର ଦୁଃଖେ ମୁହିଁ କାନ୍ଦେ,

ତୁମ ପାଇଁ ମୋର ଲୁହ ଝରି ନାହିଁ

        ସେ ଲାଗି ନିଜକୁ ନିନ୍ଦେ ।

ଏ ଆଖିରୁ ମୋର ଲୁହ ଝରିଯାଉ

            ତୁମ ପାଇଁ ଅବିରତ, 

ମୋ ଆଖି ଲୁହରେ ଧୋଇ ଦେଉଥିବି

            ତୁମ ସୁକୋମଳ ପାଦ ।

ଆଉ ପୋଛନାହିଁ ମୋ ଆଖିର ଲୁହ

          ଝରିବାକୁ ଦିଅ ତା'ରେ,

ମୋ ଲୁହରେ ମହାସ୍ନାନ କରୁଥିବ

            ପାର୍ଥନା କଞ୍ଜ ପୟରେ ।