ଆଖି ଆଇନା

ତୋ' ଆୟତ ଆଖିର ଅୟୁତ କଥା

   ଅସରନ୍ତି ଲାଗେ ମୋତେ

ଋତୁଚକ୍ର ପରି ଅଙ୍ଗଭଙ୍ଗୀ ସରି

   ଅବୋଧ୍ୟ ଶିଳାଲିପି ସତେ ।

ବୈଶାଖ ଆସରେ ଧୂସର ଆଖିରେ

   ଉଙ୍କିମାରେ ଅସ୍ତରାଗ 

ଆଖି ଲୁହ କେବେ ଝାଳ ସହ ମିଶି

  ପଣତେ ପୋଛେ ସୁହାଗ ।

ଶ୍ରାବଣ ଆସିଲେ ନୀଳାମ୍ବୁ ଚିଲିକା

   କାକଳୀ କୂଜନେ ଭରା

ଆଖିଠାରେ ମୋତେ ବୁଡ଼ ମାରିବାକୁ

    ରାତିଦିନ ପ୍ରୀତିଝରା ।

ଶରତ ନଇଁଲେ ସଫେଦ ନୟନେ

  ଜାଗେ କାଶତଣ୍ଡି ପ୍ରେମ

ମନ ମଗଜରେ ଗଜୁରି ଭଠେରେ

   ଆଖିରେ ଆଖିଏ ଭ୍ରମ ।

ହେମନ୍ତ ଧାଇଁଲେ ଆଖି ତା'ର ଗମେ

  କାକର ପାଉଁଜୀ ଛନ୍ଦେ

ସକାଳ ପ୍ରହର ସ୍ନେହ ବେସୁମାର

 ଆଖି ନଚାଏ ସେ ଫାନ୍ଦେ ।

ଶୀତ ସରାଗରେ ଆଖି ନଇଁଯାଏ

 ସଂଜଦୀପ ପ୍ରତିଲିପି

ରାତ୍ରୀ ଜାମିନୀ ନିମ୍ଲିତ ନୟନୀ

  ଖିଲିଖିଲି ମଲ୍ଲିତାପି ।

ବସନ୍ତ ଆଣିଛି ଫଗୁଣ ବାରତା

 ଆଖିରେ ଅଖାଏ ସ୍ୱପ୍ନ

ଆଇନାର ଭ୍ରାନ୍ତି ଆଖି ଦେଖେ ନିତି

  ମୁରୁକି ସଜାଏ ମନ ।

ଅହରହ ସହଳ ତୋ' ଚକ୍ଷୁ ଯୋଗଳ

   ପ୍ରଶ୍ନବାଣ ଆତ୍ମଲିପି

ଅବୋଲକରା ମୁଁ ସୂତ୍ର ପାଉନାହିଁ

   ଉତ୍ତର ଗୁମର ମାପି ।

ମୋ ହୃଦ ଆଇନା ହେ କୁନ୍ଦ ନୟନା

  ସାତରଙ୍ଗୀ ଛବିବହି

ଜୀବନ ସାରା ମୁଁ ପଢି ନପାରେ 

  ଚେଷ୍ଟାରେ ମିଳୁଛି ତ୍ରାହି ।।