ଆକାଶ

ମନ ପକ୍ଷୀ ମୋର ଉଡ଼ି ଉଡ଼ି ଗଲା

ଆକାଶ ଛୁଇଁବା ପାଇଁ

ବାଟରେ ଭେଟିଲା ବାଦଲ ଭେଳାକୁ

ମିତ ହେଲା ବେଗେ ଯାଇ ।

ସାଙ୍ଗରେ ରହିଛି ଭଉଣୀ ଚପଳା

ଆଲୋକିତ କରେ ପଥ

ଘଡ ଘଡି ଶଦ୍ଦେ ମନର ଆନନ୍ଦେ

ଚଳୁ ଥାଏ ତାର ରଥ ।

ବାଦଲ ଉହାଡୁ ଗଗନ ଛାତିରୁ

ଉଙ୍କି ମାରୁ ଥିଲେ ରବି

ଝରି ଝରି ପଡେ ତୁଷାର ଫଳ ଯେ

ଅପୂର୍ବ ସୁନ୍ଦର ଛବି ।

ଏହି ରୂପେ କେତେ ପଥ ଅତିକ୍ରାନ୍ତେ

ଝଲସିଲା ସାତ ରଙ୍ଗ

ସୂରଜ କିରଣ ହୋଇ ବିକିରଣ

ଇନ୍ଦ୍ରଧନୁ ନାମେ ସାଙ୍ଗ ।

ଗୋଧୂଳି ବେଳାକୁ ପାରି ହୋଇ ଯେବେ

ପଶ୍ଚିମ ଆକାଶ ଦେଖେ ।

ଶୁକ୍ର ତାରା ପରା ହସ୍ତ ପସାରିଣ

କୋଳେ ନେଲା ଅତି ସୁଖେ ।

ଆସେ ବିଭାବରୀ ଗଗନକୁ ଘେରି

ସୁନିଦ୍ରା ପ୍ରକୃତି ରାଣୀ

ଆକାଶ ଛାତିରେ ତାରା ପୁଞ୍ଜ ଉଇଁ

ମନ ନେଲା ମୋର କିଣି ।