କାହିଁକି କରିବି ଦୁଃଖ
କାହିଁକି କରିବି ଦୁଃଖ
କାହିଁକି କରିବି ଦୁଃଖ ହେ ଠାକୁର
କାହିଁକି କରିବି ଦୁଃଖ
କରମକୁ ଘେନି ଦିଅ ତୁମେ ବର
ଭାଗ୍ୟ ମୋର ସବୁ ଲେଖ
କାହିଁକି କରିବି ଦୁଃଖ ।
ଭରସା ବିଶ୍ବାସ ତୁମଠାରେ ମୋର
ଶୁଭ ଦୃଷ୍ଟି ଦେଇ ଦେଖ
ଧରିଛ ତୁମେ ତ ଜୀବନର ଡୋର
କରେ ଯା' ନଜର ରଖ ।
କାମ ଦେଖି ତୁମେ ଦିଅ ତ ପାଉଣା
କର ନାହିଁ କେବେ ଊଣା
ମୋ କଥା ତୁମକୁ ଅଛି କି ଅଜଣା
ହେବି କାହିଁ ବାଟବଣା ।
ତୁମେ ମୋର ଲକ୍ଷ୍ୟ ତୁମେ ହିଁ ଠିକଣା
ମନେ ଦେଉଛ ପ୍ରେରଣା
ଦୟାରେ ତୁମର ହେଉଛି ଭରଣା
ସବୁ ତ ତୁମ କରୁଣା ।
ଯେମିତି କାମକୁ ସେମିତି ମଜୁରୀ
ଦିଅ ତୁମେ ଯେ ବିଚାରି
ତୁମେ ନ୍ୟାୟ ନୀତି ଧର୍ମ ଦଣ୍ଡ ଧରି
ଜୀବେ ରଖ ଦୟା କରି ।
ଫଳ ପାଏ ଯାହା କର୍ମକୁ ଆଦରି
ଦୁଃଖ ହେଉ ଅବା ସୁଖ
ସହି ଯାଏ ତୁମକୁ ସ୍ମରଣ କରି
କାହିଁକି କରିବି ଦୁଃଖ ।
ତୁମେ ଜଗତର ନାଥ ଜଗନ୍ନାଥ
ସମ ଦୃଷ୍ଟି ଦେଇ ଦେଖ
ତୁମ ପତିତପାବନବାନା ନେତ
ଜଗତେ ଉଡାଇ ରଖ ।
କାହିଁକି କରିବି ଦୁଃଖ ହେ ଠାକୁର
କାହିଁକି କରିବି ଦୁଃଖ ।