ଆକାଶ କଇଁଆ ଚିଲିକା ମାଛ

ଜୀବନେ ଆସଇ ଏମିତି ବି ସ୍ବପ୍ନ

       ଯାହା ଅଟେ ଅବାଂଛିତ,

ବୃଥାରେ ସମୟ ନଷ୍ଟ ହୋଇଥାଏ

       ଅପୂର୍ଣ୍ଣରେ ଅଭିଳାଷ |

ବିନା ସତକର୍ମେ ସମ୍ମାନ ଖୋଜିଲେ

       ମୁକୁଟ ମିଳିବ କାହିଁ,

ମାଙ୍କଡ଼ ହାତରେ ଶାଳଗ୍ରାମ ଦେଲେ

       ପୂଜା ତ ହୋଇବ ନାହିଁ |

ପଙ୍ଗୁ ଯେବେ ଚାହେଁ ପର୍ବତ ଲଙ୍ଘିବ

       ହାଡ଼ ଗୋଡ଼ ହେବ ଚୁନା,

ସିଜୁ ବୁଦା ଛାଡି ଏଣ୍ଡୁଅକୁ ପରା

       ଭାଲୁ କୋରଡକୁ ମନା |

ସପନରେ ଦେଖି ରାଜାର ମୁକୁଟ

       ପିନ୍ଧିବାକୁ ଯେବେ ମନ,

ଚିତ୍ରାଳୟୁ କିଣି ପିନ୍ଧିଲେ ମସ୍ତକେ

       ହସିବେ କେବଳ ଜନ |

ଭିକ୍ଷା ମାଗି କେହି ପ୍ରାସାଦ ଗଢି ଯେ

       ଇଛା ରାଜା ହେବାପାଇଁ,

ମର୍ତ୍ତ୍ୟରେ ଜନମି ଇନ୍ଦ୍ର ରାଜପଦ

       ସରଗେ ମିଳିବ ନାହିଁ |

ଅବାସ୍ତବ ସ୍ବପ୍ନ ସାଉଁଟି ସାଉଁଟି

       ଚାଲିବାକୁ ନୁହେଁ ମନା,

କିନ୍ତୁ କେବେ ବି ତ ଜୀବନେ ସାଉଁଟା

       ମାଟି ହେବନାହିଁ ସୁନା |

ପର ମୁକ୍ତା ଦେଖି ଗୋଟାଇବ ଯଦି

       ନଦୀରୁ ରଙ୍ଗ ପଥର,

ଘରେ ରଖି ଖାଲି ଦେଖୁଥିବ ନିତି

        ହେବନାହିଁ ସୌଦାଗର |

କୁହୁଡିକୁ ଭାବି ଅନନ୍ତ ସାଗର

       ପହଁରିବା ଇଛା କଲେ,

ପକ୍ଷୀରାଜ ପରି କାଗଜର ଡେଣା

        ଉଡ଼ିବ କି ଲଗାଇଲେ ।

ଅବାସ୍ତବ ଇଛା କରି କେହି କେବେ

        ପାଇନାହିଁ ସଫଳତା,

ଆକାଶ କଇଁଆ ଚିଲିକାର ମାଛ

        ରନ୍ଧାଖାଦ୍ୟ ବୃଥା ଆଶା |