ଆଜିର ସମ୍ପର୍କ

ସମୟ ସହିତ ସମ୍ପର୍କ ବଦଳେ

ସମ୍ପର୍କର ମୋଡ଼ ବଦଳି ଯାଏ ,

ସ୍ମୃତି ମଥାପିଟେ ଜୀବନ୍ତ ହେବାକୁ 

ଆୟୁତ ସ୍ୱପ୍ନକୁ ସାଉଁଟି ଥାଏ ।

ପ୍ରତିଶ୍ରୁତି ସବୁ ପ୍ରତାରଣା ପୁର୍ଣ୍ଣ

ଭଲ ସମ୍ପର୍କରେ ଛଳନା ଭରେ ,

ସମ୍ପର୍କ ଭିତରେ ସ୍ୱାର୍ଥ ଲାଳସାରେ

ନିବିଡ ଦେଖଣା ଭାବ ନସରେ ।

ସ୍ୱାର୍ଥଭରା ମାୟା ଛାଇଯାଏ ଯାହା

ପ୍ରହେଳି ଭାବରେ ବୁଝି ହୁଏନି ,

ବାସ୍ତବତା ଯେବେ ସମ୍ମୁଖରେ ଆସେ

ମଧୁର କ୍ଷତର ଲୁହ ଶୁଖେନି ।

ଭାଙ୍ଗି ଭାଙ୍ଗି ଯାଏ ଧର୍ମ ବନ୍ଧ ବାଡ଼

ମନରେ ଭରେ ଅଶାନ୍ତି ନୈରାଶ୍ୟ ,

ବିବର୍ଣ୍ଣ ବଳୟେ ଧୂସର ରଙ୍ଗରେ

ରଙ୍ଗହରା ହୁଏ ବଚନ ଭାଷ୍ୟ ।

ପିୟୁଷରେ ବିଷ ବୁଝି ହୁଏନାହିଁ

ସରସତା ଲିଭେ ସମୟ ଧାରେ ,

ପ୍ରୀତି ରଙ୍ଗ ସବୁ ଫିକା ପଡ଼ିଯାଏ

ସମ୍ପର୍କ ହଜଇ ଅମାପ ଦୂରେ ।

ଏଇତ ଆଜିର ସମ୍ପର୍କର ଭାଷା

ମମତାର ମହା ପବିତ୍ର ଧାରା ,

କୃତଘ୍ନ ହୁଅଇ କୃତଜ୍ଞତା ଭାବ

ତ୍ୟାଗର ତୀର୍ଥରେ ଆଦର୍ଶ ପରା ।