ଆଜିର ସାବିତ୍ରୀ

ବରଷ ଯାକର   ଯେତେ ବାସି କାମ

     ହାଣ୍ଡି ମଜା ଛୁଆ ଧରା

ସାବିତ୍ରୀ ବ୍ରତରେ  ଟିକେ ତ୍ରାହି ମିଳେ

     ଭାବେ ସତ୍ୟବାନ ପରା ।।

ଘରଣୀ ମୋହର    କରଇ ଆଦର

     ବରଷକେ ଗୋଟେ ଦିନ

କରେ ଆଜ୍ଞାଧୀନ    ବରଷ ତମାମ

     ନୋହିଲେ ମିଳେନି ସ୍ଥାନ ।।

ସକାଳୁ ସକାଳୁ    ଚିଠା ପଢ଼ୁ ପଢ଼ୁ 

    ବୋହି ଗଲା ଯମ ଝାଳ

ଭଲ ଶାଢ଼ୀ ଶଙ୍ଖା   ସିନ୍ଦୂର ଅଳତା

    ତା ସାଥିରେ ଫଳମୂଳ ।।

ପିନ୍ଧି ଶଙ୍ଖା ଶାଢ଼ୀ  ମୁଣ୍ଡିଆଟେ ମାରି

    କରୁଛି ମୋ ପାଦେ ପୂଜା

ଭାବୁଥିଲି ମୁହିଁ  ମୋ ପରି କେ ନାହିଁ

     ଆଲାଜୁକିଆଙ୍କ ରାଜା ।।

ପାହିଗଲେ ରାତି ପତିରୁ ଯେ ଗୋତି

     ଖଟିବାଟା ହେବ ସାର

କାହିଁକି କେଜାଣି   ବରଷକେ ପୁଣି

      ଦିନକ ପାଇଁ ହୁନ୍ଦର ।।

ବରଷ ତମାମ     ଥାନ୍ତା ଏହି ଦିନ

     ଶେଷ ହୁଅନ୍ତାନି ରାତି

ଯୋଗ୍ୟ ପତି ପଣେ ଭରନ୍ତା ଜୀବନେ

     ସତେ କେତେ ସୁଖ ଶାନ୍ତି ।।

ସପନକୁ ଏତେ  ରାତି କାହିଁ କେତେ

     ବାଜୁଛି ସତର୍କ ଘଣ୍ଟି

ଘର କାମ ପୁଣି    ହାତ ଠାରିଲାଣି

     ଭାବି ଶୁଖି ଯାଏ ତଣ୍ଟି ।।

ଧନ୍ୟ ସତ୍ୟବାନ ଧନ୍ୟ ମା ସାବିତ୍ରୀ

     ଧନ୍ୟ ତୁମ ସତୀ ପଣ

ଐଶ୍ୱର୍ଯ୍ୟକୁ ଏଡି   କାଠୁରିଆ ବରି

     ବାସ କରିଥିଲ ବଣ ।।

ବଡ ଘର ଝିଅ     ହାକିମିର ସୁଅ

     ବହେ ଝରଣାଟି ପରି

ମୋ ପରିକା ଏଠି  ଖଟୁଥାନ୍ତି ବେଠି

     ସ୍ତ୍ରିରି ହାକିମିକୁ ପାଳି ।।

ସାବିତ୍ରୀଙ୍କ ସଂଖ୍ୟା ଉଭେଇ ଗଲାଣି

    ହୋଇଲେଣି ରଣଚଣ୍ଡି

କଥାରେ ନ ଗଲେ ଇଶାଣ କଣରେ

    ଶୁନ୍ୟ ମାରେ ଭାତ ହାଣ୍ଡି ।l