ଆଜିର ଦିନଟି କାଲିକି ନ ଥିବ
ଆଜିର ଦିନଟି କାଲିକି ନ ଥିବ
ସକାଳର ସୂର୍ଯ୍ୟ ରାତିକି ନଥାଏ
ପ୍ରତୀକ୍ଷା ରାତିକ ପାଇଁ
ଗଙ୍ଗଶିଉଳିର ରାତିର ମହକ
ସକାଳେ ଝଡି ପଡ଼ଇ ।
ଆଜିର ଦିନଟି କାଲିକି ନଥିବ
ଆପେ ହୋଇବ ପୁରୁଣା
ବରଷ ବରଷ ଅତୀତ ହେଉଛି
ସମାଜରେ ହୁଏ ଗଣା ।
ନୂତନ ପୁରୁଣା ଫେଣ୍ଟାଫେଣ୍ଟି ହୋଇ
ଗଢା ମଣିଷ ଜୀବନ
ପିଢ଼ି ପରେ ପିଢ଼ି କେତେଯେ ଗଲେଣି
ରଖି ଅବା ସନମାନ ।
ସବୁରି ମୂଳରେ ଇଂଗିତ ତାଙ୍କର
ତାଙ୍କ ସୃଷ୍ଟି ତାଙ୍କ ନୀତି
ପରଖିବା ପାଇଁ ମଣିଷ ପାଖରେ
ନାହିଁ ସାମାନ୍ୟ ଶକତି ।
ଦଇବ ଦଉଡ଼ି ମଣିଷ ଗାଈ ଯେ
ଓଟାରେ ଯେଣିକି ଯାଇ
ଜଗନ୍ନାଥ ପ୍ରଭୁ କାଳିଆ ସାଆନ୍ତ
ରଖନ୍ତୁ ଘଣ୍ଟ ଘୋଡାଇ ।