ଆଜି ଏଇ ସାଧାରଣତନ୍ତ୍ର ଦିବସେ

ଜାନୁଆରୀ ଛବିଶରେ    ଫରଫର ହୋଇ ଉଡେ

         ତ୍ରିରଙ୍ଗା ଉଡଇ ସାରା ଭାରତବର୍ଷେ

ଭାରତମାତାର ଜୟ     ଜାତୀୟ ସଂଗୀତେ ଲୟ

        'ବନ୍ଦେ ମାତରମ୍' ଗାନକରେ ହରଷେ

         ସାଧାରଣ ତନ୍ତ୍ର ଦିବସେ

କେତେ ଆଶା ଉଦ୍ଦୀପନା ଜାଗେ ମାନସେ |

ସାର୍ବଭୌମ ଗଣତନ୍ତ୍ର     ଧର୍ମ ନିରପେକ୍ଷ ତନ୍ତ୍ର

    ସମାଜବାଦର ରାଷ୍ଟ୍ର ଭାବେ ଭାରତ

ଆଗେଇଲା ଆଉ ଏକ    ପାଦ ଦୂରତା ଆଗକୁ

   ଦେଶେ ଗଣତନ୍ତ୍ର ସଫଳତା ସହିତ

    ପାଦରେ ପାଦକୁ ମିଳାଇ

କାନ୍ଧକୁ କାନ୍ଧ ମିଶାଇ ଯିବା ଆଗେଇ |

ହିନ୍ଦୁ ଜୈନ ମୁସଲ୍ମାନ    ବୌଦ୍ଧ ଅବା ଖ୍ରୀଷ୍ଟିୟାନ         

ସଭିଙ୍କୁ ସମାନ କହଇ ସମ୍ବିଧାନ

କଳା ଗୋରା ଉଚ୍ଚ ନୀଚ୍ଚ    ସବୁ ଜାତି ସବୁ ଧର୍ମ

   ଯେଉଁଠି ଥାଉ ପଛକେ ତା ବାସସ୍ଥାନ

        ସକଳେ ଅଟନ୍ତି ସମାନ

   ସଭିଙ୍କର  ଅଧିକାର ଅଟେ ସମାନ |

ନାରୀ ପୁରୁଷ ସରବେ     ଲଭନ୍ତି ସମାନ ଭାବେ

    ସ୍ୱାଧୀନେ ସ୍ୱଚ୍ଛନ୍ଦେ ବଞ୍ଚିବା ଅଧିକାର

ନାହିଁ ଉଚ୍ଚ ନୀଚ୍ଚ ଭେଦ    ଜାତି ଧର୍ମର ବିବାଦ

    ନାହିଁ ଏଠି ସ୍ଥାନ ଶୋଷଣ କଷଣର

      ସାମ୍ୟତା ଐକତ୍ବ ବିଧାନ

 ଗଣତନ୍ତ୍ର ଶାସନରେ ରହିଛି ଜାଣ |

ଆଜିର ପବିତ୍ର ଦିନେ       କରିବା ପ୍ରତିଜ୍ଞା ମନେ

       ରଖିବା ଦେଶରେ ଶାନ୍ତିପୂର୍ଣ୍ଣ ସଦ୍ଭାବ

ଏ ଦେଶର ଅଖଣ୍ଡତା     ଦୃଢ ଜାତୀୟ ଏକତା

        ରଖିବାନି ଜାତି ଧର୍ମ ବିଭେଦ ଭାବ

          ଗଣତାନ୍ତ୍ରିକ ଅଧିକାର

    ପାଇ ଖୁସିହେବେ ଏଠି ସକଳ ନର |

ତିଷ୍ଠି ରହୁ ସମ୍ବିଧାନ       ତଦନୁଯାୟୀ ଶାସନ

       ଗଣଦ୍ୱାରା ଗଣପାଇଁ ଗଣ ଶାସନ

ସର୍ବେ ହେବା ସଚେତନ      ହଟୁ ଦୁର୍ନୀତି ଶୋଷଣ

         ଭ୍ରଷ୍ଟାଚାର ନିର୍ଯ୍ୟାତନା ସର୍ବ କଷଣ

         ସାବ୍ୟସ୍ତ କରି ଅଧିକାର

     ପାଳନ କରିବା କର୍ତ୍ତବ୍ୟ ସକଳର |