ଲାଇବ୍ରେରୀ
ପ୍ରୋଫାଇଲ୍
ଆହା ମୋ ନନ୍ଦ କୋଳେ ଗୋବିନ୍ଦ
ଆହା ମୋ ନନ୍ଦ କୋଳେ ଗୋବିନ୍ଦ
ଆହା ମୋ ନନ୍ଦ କୋଳେ ଗୋବିନ୍ଦ
ଉଇଁ ଆସିଛି କି ଆଜି ପୂର୍ଣ୍ଣମୀର ଚାନ୍ଦ ।
ପୂର୍ଣ୍ଣମୀର ଚାନ୍ଦ ଦେହେ ଲାଗିଛି କଳଙ୍କ
ନନ୍ଦ କୋଳେ ଏ ଚନ୍ଦ୍ରମା ଦିଶେ ନିଷ୍କଳଙ୍କ ।
କୌମୁଦୀ ଆସୁଛି ଝରି ଚନ୍ଦ୍ର ମଣ୍ଡଳରୁ
ଖିଲି ଖିଲି ହସ ଆସେ ଗୋବିନ୍ଦ ମୁଖରୁ ।
କି ମଧୁର ଲାଗେ ହସ ମୁଖ କି ମଧୁର
ଅଧର ମଧୁର ତାର ନୟନ ମଧୁର ।
କୁଞ୍ଚିତ କେଶ ମଧୁର ବିଶାଳ ନୟନ
କେଡେ ଶୋଭାବନ ଦିଶେ ଶ୍ୟାମ ଅପଘନ ।
କପାଳରେ ଶୋଭାପାଏ କସ୍ତୁରୀ ଚନ୍ଦନ
ବକ୍ଷଦେଶେ କଉସ୍ତୁଭ ମଣି ଚଳମାନ ।
ମୁକୁତା ଝଳି ଦିଶୁଛି ନାସିକା ଅଗ୍ରରେ
ବେଣୁଧର ବେଣୁ ଧରିଛନ୍ତି ସ୍ୱହସ୍ତରେ ।
ସର୍ବାଙ୍ଗେ ହରିଚନ୍ଦନ ହୋଇ ବୋଳାବୋଳି
କଣ୍ଠରେ ଶୋଭା ପାଉଛି ମୁକୁତାର ମାଳି ।
ଗୋପାଙ୍ଗନା ବେଢିଛନ୍ତି ଚଉ ପାରୁଶରେ
ଗୋବିନ୍ଦ ପାଆନ୍ତି ଶୋଭା ନନ୍ଦଙ୍କ କୋଳରେ ।
କଳା ଟୋପାଏ ଲାଗିଛି ଗୋବିନ୍ଦ କପାଳେ
ଦୃଷ୍ଟି ପଡିଯିବ କାର ଯଶୋମତୀ ଭାଳେ ।
ନନ୍ଦର ଆନନ୍ଦ ଆଜି କେ ପାରିବ କହି
ଅପୁଆ ଘରେ ଏ ପୁଅ ପଶିଛି ଧସାଇ ।
ବଡଭାଇ ବଳରାମ ଆଗୁଁ ଆସିଛନ୍ତି
ଧଳା କଳା ବେନିଭାଇ କି ଶୋଭା ଦିଶନ୍ତି ।
ଆସ ଆମେ ଗୋପବାସୀ ନନ୍ଦଘର ଯିବା
ରାମ କୃଷ୍ଣ ବେନି ଭାଇ ନୟନେ ଦେଖିବା ।
ନନ୍ଦ ଆନନ୍ଦରେ ଆମ ଆନନ୍ଦ ମିଶାଇ
ପୂର୍ଣ୍ଣାନନ୍ଦ ଲଭିବା ଗୋବିନ୍ଦ ନାମ ଗାଇ ।
ନନ୍ଦ ରାମ ଗୋବିନ୍ଦ ନାମକୁ ହେତୁ କର
ଗୋବିନ୍ଦ ଗୋପାଳ ନାମ ହୃଦରେ ସୁମର ।
