ଆହା କି ସୁନ୍ଦର

ଆହା କି ସୁନ୍ଦର ସୁନାବେଶେ ମୋର

ମଣିମା କଳାଠାକୁର

ଜଗତର ନାଥ ମୋ କଳା ବାମନ

ମହାରାଜ ରାଜେଶ୍ୱର ।

ଶୁକ୍ଳ ଏକାଦଶୀ ପବିତ୍ର ବାହୁଡା

ସିଂହ ଦ୍ୱାରେ ତିନିରତ

ଲଭନ୍ତି ଦର୍ଶନ ବଡ଼ ତଡାଉର

ସମସ୍ତ ଶ୍ରଦ୍ଧାଳୁ ଭକ୍ତ ।

କିରୀଟ କୁଣ୍ଡଳ ଭୂଜ ଶ୍ରୀ ପୟର

ବାହାଡା ଘାଘଡା ମାଳୀ

ତିଳକ ଚନ୍ଦ୍ରିକା ଚନ୍ଦ୍ର ସୂର୍ଯ୍ୟ ଚିତା

ଭିଡି ପଟି ଆଡକାନୀ ।

ପ୍ରଭୁଙ୍କ ଶ୍ରୀ ଅଙ୍ଗ ଦିଶେ ସ୍ୱର୍ଣ୍ଣମୟ

ଲାଗି ନାନା ଅଳଙ୍କାର

ସେବନ୍ତି ତଳିଚ୍ଛ ଅବା ଭିତରଚ୍ଛୁ

ପୁଷ୍ପାଳକ ମହାପାତ୍ର ।

ବଡ଼ଦାଣ୍ଡେ ଦିବ୍ୟ ସୁଲଭ ଦର୍ଶନ

ସାର୍ଥକ କରେ ଜୀବନ

ହରେ ପାପତାପ ଦୁଃଖ କଷ୍ଟ କ୍ଳେଶ

ଉଦ୍ଧରେ ପତିତ ଜନ ।