Library
ଆଧୁନିକ ନାରୀ
ଆଧୁନିକ ନାରୀ
ପୁରୁଷ ପ୍ରଧାନ ସମାଜର ଦୃଢ଼
ଅଲଙ୍ଘ୍ୟ ବଳୟ ଭେଦ କରି
ସଫଳତା ଶୀର୍ଷ ଦେଶରେ ଅଧିଷ୍ଠ
ହୋଇଲାଣି ଆଧୁନିକ ନାରୀ |
ସକଳ କ୍ଷେତ୍ରରେ ଟକ୍କର ଦେଇ ସେ
ପୁରୁଷକୁ ଠେଲି ଆଗେ ଠିଆ
ଶିକ୍ଷା ଜଗତରେ ସର୍ବାଗ୍ରଣୀ ସିଏ
ନାଚରେ ଗୀତରେ ମହନୀୟା |
କ୍ରୀଡା ନୈପୂଣ୍ୟରେ ସ୍ତମ୍ଭୀଭୂତ କରେ
ପୁରୁଷ ସମାଜେ ଚକମା ଦେଇ
ପର୍ବତାରୋହଣେ ସିନ୍ଧୁ ସନ୍ତରଣେ
ମହାକାଶେ ଯାଏ ବାଜି ଲଗେଇ |
ରାଜନୀତି କ୍ଷେତ୍ରେ ସମର ଅଙ୍ଗନେ
ତାର କରିସ୍ମାର ତୁଳନା ନାହିଁ
କୃଷି କ୍ଷେତ୍ରେ ତାର ସହଭାଗୀତାର
ପ୍ରଶଂସା କରନ୍ତି ପୁରୁଷେ ରହି |
ଚାକିରୀ ଜୀବନେ କର୍ମ ସମ୍ପାଦନେ
ନିରଳସ ନିଷ୍ଠା ଦୃଷ୍ଟାନ୍ତ ଥୋଇ
ଆଦର୍ଶ ଗୃହିଣୀ ସ୍ୱାମୀ ସୋହାଗିନୀ
ସଂସାର ବୋଝକୁ ପିଠିରେ ବୋହି |
କଳ କାରଖାନା ସୁପରିଚାଳନା
ଯାନ୍ତ୍ରିକ କୁଶଳା ଶିଳ୍ପୀ ସିଏ
ଇଣ୍ଟରନେଟରେ ବ୍ୟାଙ୍କ ବ୍ୟାପାରେ
ସଭିଙ୍କର ମନ ମୋହିନିଏ |
ନ୍ୟାୟାଳୟେ ସିଏ ଓକିଲାତି କରେ
ବିଚାରପତି ସେ ହୋଇଥାଏ
ୱାର୍ଡ ମେମ୍ବର ଠାରୁ ମୁଖ୍ୟମନ୍ତ୍ରୀ
ରାଷ୍ଟ୍ରପତି ପଦ ମଣ୍ଡିଥାଏ |
ପୁରୁଷ ସାହାଯ୍ୟ ବିନା ଆଜି ସିଏ
ଆତ୍ମପ୍ରତିଷ୍ଠା କରିପାରେ
ଦେଶ ଦେଶାନ୍ତରେ ଚାକିରୀ କରି ସେ
ସ୍ୱଚ୍ଛନ୍ଦେ ସ୍ୱାଧୀନେ ଦିନ ସାରେ |
ଢିଙ୍କିଶାଳ ଠାରୁ ଟଙ୍କାଶାଳ ଯାଏ
ସବୁଠି ତାହାର ହାତ ଥାଏ
ଜନନୀ ଭଗିନୀ ଜାୟା କନ୍ୟା ରୂପେ
ସଂସାରେ ସବୁଠି ପୂଜା ପାଏ |
ସାଧବା ନାରୀର ସୀମନ୍ତେ ସିନ୍ଦୂର
ମଥାରେ ଓଢ଼ଣୀ ଭୁଲ ନାହିଁ
ପାଶ୍ଚାତ୍ୟ ସଭ୍ୟତା ରୁଚି ବିବର୍ଜିତା
ହିନ୍ଦୁତ୍ୱ ଆଦର୍ଶ ବାଣ୍ଟ ଯାଇ |
