ये थोडं जीवन जगू

खूप निरस झालंय सखे 

ये थोडं जीवन जगू 

एकमेकात मिसळून जरा 

हे क्षण जवळून बघू ||0||

उदासीला सीमा हवी 

दु:खालाही अंत हवा 

जीवनाच्या पुस्तकात 

वाचु एक धडा नवा 

कितीही वादळं आली तरी 

एकमेका धरून तगू 

एकमेकात मिसळून जरा 

हे क्षण जवळून बघू ||1||

विझलेलं हे जीवन भासे 

नावीन्य ना उरले काही 

काहीतरी चुकतंय आपलं 

धूसर या दिशा दाही 

आग हृदयी पेटवून 

पुन्हा पुन्हा धगधगू 

एकमेकात मिसळून जरा 

हे क्षण जवळून बघू ||2||

दुःखाच्या अंधाराने 

घाबरून जायचं नसतं 

दिसतं त्याच्या बऱ्याचदा 

सखे विपरीत असतं 

प्रेमाच्या किरणांनी मिठीत 

येऊन आता झगझगू 

एकमेकात मिसळून जरा 

हे क्षण जवळून बघू ||3||

मिठीत तुला घेताना 

आकाशाला कवेत घेतो 

तुझ्यात विश्व पाहताना 

तुला प्रेमविश्वात नेतो 

श्वासात श्वासा मिसळून 

एकमेकांना बिलगू 

एकमेकात मिसळून जरा 

हे क्षण जवळून बघू ||4||