स्वप्नभंग

स्वप्न विणतो नवे झोपतांना

स्वप्न माझे जुने भंगतांना

आज संसार का फाटला हा

ओठ माझे तुझे भेटतांना

वाजले ढोल ताशे नगारे

साजणी हात तू सोडतांना

नाव माझी कुठे सापडेना

वादळाशी सदा झुंजतांना

वाटतो दूर नाही किनारा

थांबला श्वास का पोहतांना

पेटली चूल पोटात आता

चूल विझली घरी पेटतांना

का सजा रोजची फुलांना

कंटकांना सुखी ठेवतांना

रक्त माझे किती सांडलेले

भूतकाळा तुला भांडतांना

भावना गोठल्या का दुपारी

मी उन्हाच्या झळा सोसतांना

जाळले पोळले जीवनाने

शांतता लाभली संपतांना