सरले बालपण
सरले बालपण
फिरेल का मागे पुन्हा,पुढे पळणारा काळ
दुडूदुडू धावणारं होता येईल का बाळ?
काऊ-चिऊच्या गोष्टी ऐकत,खाऊ वरणभात,
बागुलबुवाच्या भितीने शिरू गोधडीच्या आत
लिमलेटच्या गोळ्यांसाठी रडून करू हट्ट,
जत्रेच्या गर्दीत धरू बाबांचा हात घट्ट
भातुकलीचा खेळ मांडू घराच्या कोप-यात,
सारे जग विसरून जाऊ काचापाणी-ठिक-यात
मोठेपण घेऊन आले आयुष्याचे ताण,
हरवले बालपण देऊन आठवणींचे वाण.