समजून घे मना: एक गझल
समजून घे मना: एक गझल
आघात तू विजांचे झेलून घे मना
प्रेमात वादळांशी खेळून घे मना
कंठात आज आला दाटून हुंदका
धरणास आसवांच्या बांधून घे मना
गेलीत माणसांना सोडून माणसे
एकांत वेदनांनी सजवून घे मना
जिंकूनही लढाई हरलोच मी कसा
झालेय राजकारण समजून घे मना
मारून कोण गेले शत्रू विना मला
मित्रांत एक शत्रू मोजून घे मना
प्रेमात काय माझा झाला सखी गुन्हा
शिक्षा उगाच झाली भोगून घे मना
कष्टात राबतांना उपवास का मला
झाले महाग जीवन जाणून घे मना
खेळून भावनांशी हसतात लोक का
ही रीत या जगाची रुजवून घे मना
झाला उठाव मोठा मौनात एकदा
आताच तू स्वत:ला जिंकून घे मना