Library
रवी मी
रवी मी
सुप्त गुणांना देण्या वाव
पाहिलं मी डोकावून आत ,
कितीतरी असे विषय
घोळत पडले होते मनात !!
शुभ्र पांढऱ्या कागदावर
चित्र जेव्हा काढून पाहिलं ,
माझं मलाच कळत नव्हतं
असं कसं होऊन राहिलं !!
छानपैकी जमलं चित्रं
घरातले कौतुक करी ,
अन् त्या कौतुकाने मग
मनी माझ्या आनंद भरी !!
म्हंटल अजून स्वतःला
पाहूया जरा निरखून ,
ठिपक्यांची मग रांगोळी
काढू लागलो हरखून !!
जमली इतकी छान रांगोळी
बक्षीसं लागली मिळायला ,
माझ्यातले ते सुप्त गुण
लागले मज कळायला !!
अजुनी काहीतरी होतं
या उराशी दडलेलं ,
ओठांवर येऊनही
ओठांवरतीच अडलेलं !!
झाली ओळख लेखणीशी
लिहू लागलो काही काही ,
लिहिता लिहिता इतकं लिहिलं
जणु वाटे ते माझंच नाही !!
मनातलं मग लेखणी ती
कागदावर लिहू लागली ,
समाजातल्या अन्यायाला
वाचा देण्या बोलू लागली !!
बांधला मनाशी चंग
पत्रकारितेचा घेतला वसा ,
वाटे जिकडे चुकते काही
तिकडे माझा उमटवला ठसा !!
अजुनी मनात आहे काही
जे ते स्वतः करू पाही ,
किचनमधल्या स्वयंपाकात
इच्छा ती गुरफटून जाई !!
बनवणं स्वयंपाक
ही सुद्धा आहे कला ,
अन् या कलेपासून
मी कसा दूर राहीन भला !!
आजमावला हात इथेही
पण डाळभाताशिवाय जमेना ,
ओशाळलेलं मन माझं
मग स्वयंपाकातही रमेना !!
करून पाहिले खूप उपक्रम
पण जे जे जमेल ते करावं ,
आपुल्या या आयुष्यामध्ये
आपणच आपलं सुख भरावं !!
