प्रेम आणि वास्तव

तुझे स्वप्न पाहतांना

कळी गुलाबी फुलली

नभी धुमकेतू आले

रात्र काळी उजळली

तुझा स्पर्श झाला आणि

दार भाग्याचे खुलले

कसे कोणास ठाऊक

दैव माझे पालटले

डाव माझा हारलेला

कसा जिंकलो कळेना

हात हातात सखीचा

तरी उत्तर मिळेना

ऋतू माझा बहरला

झाला हिरवा उन्हाळा

ऐन वैशाख मासात

सुरू झाला पावसाळा

प्रेम आहे तुझ्यावर

जरी वणवे पेटले

तुझ्या मिठीत साजणी

मोठे वादळ शमले

भान वास्तवाचे नाही

पर्वा जगाची कुणाला

तोडू बंधने जातींची

धर्म प्रेमाचा आपला