Library
Profile
पोटाची खळगी
पोटाची खळगी
1 min
318
पोटाची खळगी | भरायची चिंता ||
दिस उगवता | गरिबाला || १||
वितभर पोट | आटापिटा करी |
मिळेल भाकरी | खायावया || २ ||
जिवा घालमेल | शोधिसी रे काम
नाहीच आराम | कधी जिवा || ३ ||
सदा मरमर | रोजच मरण ||
असलं जगणं | गरीबांचं ||४||
श्रीमंतांच्या घरी | अन्न वाया जाई |
गरिबांस नाही | घास खाण्या ||५||
कधी मिटे दरी | ही विषमतेची |
व्यथा भाकरीची | कळेल का ||६||
पोटाची खळगी | भरता भरेना |
दिवस जाईना | न खाताना ||७||
वितभर पोट | पण झोप नाही |
पोटाची ही लाही | होत असे ||८||
श्रीमंताला अन्न | जिर्ण रे होईना ||
झोप रे येईना | रात्रंदिन ||९||
गरिबाला चिंता | आजच्या पोटाची ||
चिंता रे रोजची | सतावित ||१०||
अन्न हो वाचवा | गरिबां पाठवा ||
अन्नदान ठेवा | कधी कधी ||११||
मिनु म्हणे आता | करा अन्नदान ||
कार्य हे महान | ठेव ध्यानी ||१२||
