ओवीबद्ध चरित्र :संत चिंतामणी

मोरया गोसावी थेऊरासी | गणेश देई दृष्टांतासी |

तुझ्या वंशी जन्मासी | येतो पुत्र म्हणोनिया ||१ ||

 वचन हे चिंतामणीचे | भाग्य थोर गोसावींचे |

'चिंतामणी' नांव पुत्राचे | ठेविती मोरया गोसावी ||२ ||

हैबतखान चाकणचा | नैवेद्य मद्य मांसाचा |

होई प्रसाद दूध फळाचा | चमत्कार करी चिंतामणी ||३ ||

एक निपुत्रिक ब्राह्मण | तळेगावातून येऊन |

आम्रफल त्यासी देऊन | पुत्र देती चिंतामणी ||४||

गवंजेकर नामे भक्त | गणेश दर्शनासी जात |

यवन अधिकारी डांबत | तुरुंगात तयासी ||५||

चिंतामणी सुटका करिती | भक्तासी दर्शन देती |

गुप्तपणे कार्य साधती | अचंबित होती यवन ||६||

चिंतामणीभक्ताचे गलबत | वादळी सापडत |

भक्त धांवा करित | चिंतामणी महाराजांचा ||७||

पंगतीत असती चिंतामणी | अदृश्य होती झणी |

गलबतात न शिरे पाणी | वाचती प्राण भक्ताचे ||८||

पंगतीत येऊन बसले | अंग पाण्याने भिजले |

भक्तांनी तयांसी पाहिले | चमत्कार चिंतामणींचा ||९||

श्रीविष्णू शिवशंकर | धरिती वेष फकीर |

भिक्षापात्र घेऊन कर || पातले मोरया समाधी दिनी ||१०||

चिंतामणी त्यांना ओळखून | भिक्षा देण्या जाती धांवून |

ब्राह्मणांआधी फकिरांसी भोजन | दिले म्हणून विप्र कोपती ||११||

अनगडशहा बाबा | भिक्षा मागी घेऊन तुंबा |

सर्वांसी वाटे अचंबा | धान्य भरूनी न भरे तुंबा ||१२||

चिंतामणी जाणती | गजानन म्हणून दुर्वा टाकती |

तुंबा धान्याने भरती | गर्वहरण होई बाबाचे ||१३||

दरिद्री विप्र येई चिंचवडास | चिंतामणी देती प्रसादास |

मूठभर डाळ उपरण्यास | प्रसाद घेऊन बांधी तो ||१४ ||

निराश होवोनी परतत | वाटेत एक नदी दिसत |

डाळ पाण्यात सोडत | जाई स्वगृहासी तो ||१५||

झटके तो उपरणे | पडती डाळीचे पाच दाणे |

त्याचे होई सोने | जाई दारिद्र्य विप्राचे ||१६||

तुकोबा येता चिंचवडास | भोजनी बसविती विठ्ठलास |

वदती चिंतामणींस | आवहन करा गणेशाचे ||१७||

तेव्हा घडे आक्रीत | सोंड येई कपाळात |

गणेशरूप प्राप्त होत | चिंतामणी महाराजांना ||१८||

' देव' वदती तुकाराम | तेंचि होतसे कुलनाम |

असे चिंचवड ग्राम | तीर्थक्षेत्र पवित्र ||१९||

पौष वद्य चतुर्थीला | सोडोनी उपवासाला |

 जाती निजधामाला | चिंतामणी महाराज ||२० ||

ऐसी तयांची कथा | वाचावी भक्त हो सर्वथा |

वैभव ठेवितो माथा | सद्गुरूंच्या चरणासी ||२१||