ओवीबद्ध चरित्र : संत चिदंबर

आज पौष शुद्ध ४. श्री चिदंबर दीक्षित महास्वामी (बेळगांव जवळील मुरगोड गाव) यांची पुण्यतिथी आहे. त्यानिमित्ताने माझी ही रचना

मार्तंड लक्ष्मी दांपत्य | शिवोपासना करी नित्य |

जन्मे तेजस्वी अपत्य | तयांच्या दीक्षित कुळी ||१ ||

आठ वर्षाचे रूप घेत | कानी बिल्वाक्षता दिसत |

व्याघ्रचर्म सर्प शोभत | बाळ शिवाचे रूप दिसे ||२ ||

दीक्षित दांपत्य म्हणती | धरावे बाळ रूपाप्रती |

साक्षात गौरीपती | 'चिदंबर' नाम ठेविले ||३ ||

व्रत असे गजगौरी | एका ब्राह्मणा घरी |

प्राणप्रतिष्ठा गजाची करी | बाळ चिदंबर ||४||

चिदंबर पूजा आटपोनी | येई गृहालागोनी |

गज जिवंत होवोनी | पळू लागे सैरावैरा ||५||

करोनी उत्तरपूजा | केले निर्जीव मृत्तिकागजा |

सुखी केली भक्तप्रजा | बाळ चिदंबरांनी ||६||

कानी कुंडले डुलती | पीतांबर नेसती |

रूद्राक्षमाळा शोभती | मस्तकी पगडी विलसे ||७||

सावित्री सरस्वती | दोन भार्या असती |

गंगा आणि पार्वती | अवतार घेऊनी आल्या ||८||

मुरगोड ग्रामी यज्ञयाग | करिती स्वामी सोमयाग |

ऋषीमुनींचा सहभाग | अन्नसंतर्पण होतसे ||९||

अचानक अन्नछत्रात | तूप कमी पडत |

भक्त घागरींत भरत | मलप्रभा नदीजल ||१०||

पाण्याचे झाले तूप | वाटे सर्वां अप्रूप |

पंगतीत वाढती तूप | स्वामी समर्थ महाराज ||११||

एक भक्त बुडतो नदीत | स्वामी तयासी वाचवत |

बसल्याजागी वस्त्र भिजत | चिदंबर स्वामींचे ||१२||

विद्वानांचे गर्वहरण | मुका बाळ करी नामस्मरण |

होई वेदांचे स्मरण | वादविवाद जिंकले ||१३||

करिती मातीचे सोने | धांवती भक्ताकारणे |

कधी न पडे उणे | चिदंबर स्वामी भक्तवत्सल ||१४||

नसे भेद शैव वैष्णव | सर्वांठायी असे देव |

मनी धरा शुद्ध भाव | नुरे काही अद्वैत ||१५ ||

आंधळ्यास देती दृष्टी | दुष्काळात करिती वृष्टी |

कोणी दिसे दुःखी कष्टी | तयासी सुखी केले ||१६||

भूतप्रेत दूर पळती | रोग व्याधी नष्ट होती |

भवताप हरती | नाम घेता 'शिवचिदंबर' ||१७||

मुरगोड असे काशीक्षेत्र | भक्तांवरी मम कृपाछत्र |

वास माझा सर्वत्र | मी योगक्षेम चालवितो ||१८||

समाधी द्विभार्यांसवे | औदुंबरावृक्षासी तेज नवे||||

शिवलिंग स्थापिले नवे | समाधीस्थानी तयांच्या ||२ ०||

आजि असे पुण्यतिथी | जागवू तयांची स्मृती |

सद्गुरूकृपेने माहिती | देतसे येथे 'वैभव' ||२१|