ओवीबद्ध चरित्र : संत गगनगिरी महाराज

गणपत विठाबाई दांपत्य | वारीसी करी नित्य |

'श्रीपाद' नाम अपत्य | जन्मासी आले वंशी ||१ ||

आठवे वर्षी घर सोडिती | नाथ पंथ दीक्षा घेती |

घराण्यातील असती | चालुक्य पहिला पुलंकेशी ||२ ||

चित्रानंद स्वामी चित्रकूट पर्वत | त्यांचे दर्शन होत |

व्यासगुंफेत पहुडत | श्रीपादस्वामी दमलेले ||३ ||

कफनीधारी सिद्ध येती | कमंडलूजल शिंपडिती |

हिरवा पाला खायला देती |म्हणती जावे दक्षिणेकडे ||४||

द्वारका जगन्नाथपुरी | अरवली कन्याकुमारी |

सातपुडा नीलगिरी |स्थाने देखिती श्रीपाद ||५||

अनेक वर्षे तप करिती | झाडाच्या डोलीत वसती |

भाजीपाला मुळे खाती | सिद्धावस्था पावती ते ||६||

जवळी करवीरी | स्थिरावी गगन गडावरी |

जन म्हणती गगनगिरी | प्रसिद्धी होतसे सर्वत्र ||७||

सर्व योगक्रिया अवगत | पाण्याच्या तळाशी जात |

जलतपस्या करीत | गगनगिरी महाराज ||८||

दर्शन मुंबई महालक्ष्मीचे | नंतर घ्या मुंबादेवीचे |

मुंबईच्या संपन्नतेचे | गूज सांगती गगनगिरी ||९||

खोपोलीस समाधी घेती | आजि पुण्यतिथी |

शंभर वर्षांहून जगती | गगनगिरी महाराज ||१०||

वैभव नमितो सद्गुरूनाथा | चरणी ठेवी माथा |

कृपा असावी सर्वथा | भक्तांवरी आपुल्या ||११||