कविकुलगुरू कालिदास

हे कवीकुलभूषणा | तूच कवितारमणा |

हे कालिदासा विद्वाना | चरणी मी नमितो ||१ ||

आजि तयांची महती | आषाढ प्रथम तिथी |

महिमा वर्णावा किती | श्रेष्ठ कालिदासांचा ||२ ||

दुष्यंत शकुंतलेची | अंगठी आठवणीची |

कथा असे विवाहाची | 'अभिज्ञानशाकुंतल' ||३ ||

निसर्गाचे ऋतू सहा | पशू पक्षी झाडे पहा |

सौंदर्याची खाण अहा! 'ऋतुसंहार' काव्य ||४||

काव्य 'कुमारसंभव' | शृंगार पार्वती शिव |

जन्म कार्तिकेय देव | वर्णन असे त्याचे ||५||

नृत्यांगना मालविका | अन् अग्निमित्र शासका |

प्रेमे वर्णिले नाटका |' मालविकाग्निमित्रम्' ||६||

खंडकाव्य 'मेघदूत' | यक्षाचे विरहवृत्त |

नेई यक्षपत्नीप्रत | आषाढ कृष्णमेघ ||७||

महाकाव्य 'रघुवंश' | ईक्ष्वाकू कुळाचा वंश |

रघुराजा ईश अंश | थोरवी असे त्याची ||८||

स्वर्गी अप्सरा उर्वशी | पूरुरवा प्रियकराशी |

ती उधळी प्रेमराशी | 'विक्रमोर्वशीयम्' ||९||

कालिदासाचा महिमा |गावा आनंदे सप्रेमा |

कालिदासाची उपमा|शब्दप्रयोग रूढ|१0|