नंदादीप-संवादाची तेलवात
नंदादीप-संवादाची तेलवात
शुभंकरोति कल्याणम् दे
सकारात्मक ऊर्जा घरात
दिव्या दिव्या दीपत्कार जेव्हा
लावू शुभंकर सांजवात
कितीक साधने प्रकाशाची
चमचमणारी दुनियेत
परि मंद तेवणारा दीप
भाव प्रसन्न, सात्विक देत
मंदिरातील गाभाऱ्यातही
जेव्हा नंदादीप उजळती
दिवे विजेचे मालवताच
येई मांगल्याची अनुभूती
आजी-आजोबा नंदादीप हे
शांत तेवणाऱ्या जणू ज्योती
आशीर्वच अमोल तयांचे
आम्हा वरदानच ठरती
दीपक, पणत्या, नंदादीप
सजीव सदैवच घरात
स्नेह, प्रेम, माया, संवादाची
पुरवावी त्यांना तेलवात