मृद्गंधाच्या धारा
मृद्गंधाच्या धारा
सृष्टीला न्हाऊ घालण्या
आता येरे घना येरे घना |
घामाच्या धारा सर्वांगाची
लाही लाही सहन होईना | |१| |
सृष्टी सारी तहानलेली
जमीन भेगाळलेली |
तुझीच वाट पाहातांना
शेतीची कामे रेंगाळलेली | |२| |
वाट पहातोय चातक पक्षी
तृष्णा त्याची भागव जरा |
नभ मिलना आसूसलेल्या
चिंब भिजवून टाक धरा | |३| |
येरे घना येरे घना घटवण्यास
नकोशा उन्हाचा चढता पारा |
सारे जीव आतुर स्वागता तुझ्या
बरसू देत मृद्गंधाच्या धारा | | ४| |
येरे घना येरे घना म्हणत तृषार्त सृष्टी कशी मृगाच्या सुगंधित धारांचे स्वागत करण्यास आतुरलेली आहे हेच भाया कवितेतून सांगितले आहे.