माणूस म्हणून...

जेव्हा मी नजर टाकते

सभोवार माणूस म्हणून

कितीतरी गोष्टी शिरतात

डोळ्यांच्या झरोक्यांमधून (1)

बिचारं बालक अगदी

भुकेनं वखवखलेलं

शेजारीच वाढदिवस

अन्न पत्रावळींतून सांडलेलं (2)

झोपडपट्टीत कलकलाट

भांडणांचा कडकडाट

मुलाचा अभ्यास चाललेला

घरात भांड्यांचा खणखणाट (3)

प्रपंच सावरणारी रखमा

नवऱ्याच्या व्यसनाला कंटाळून

तसाच प्रपंच ओढत असते

मुलांना शिकवायचे म्हणून (4)

कुठं रोषणाईचा लखलखाट

कुठं मेजवानीचा थाटमाट

झोपडीत कुणी आसवं गाळतं

कशी घालू हातातोंडाची गाठ? (5)

माणूस म्हणून हे सर्व बघताना

माझी घालमेल होते जीवाची

का रे देवा इतकी विषमता?

जरा समता आण रे न्यायाची!!  (6)