Library
Profile
माझे गुरुजी
माझे गुरुजी
काळ्या दगडावर मारली
पांढऱ्या दगडाची रेघोटी
गुरुजींनी रंगवली माझ्या
कोऱ्या आयुष्याची पाटी
आयुष्याला माझ्या
चौकट अज्ञानाची होती
खुली झाली फाटके
वाट गुरु ज्ञानाची होती
गुरुजींनी मला
बोलायला शिकवलं
खऱ्याखोट्याचं मापटं
तोलायला शिकवलं
वाचायला शिकवलं
लिहायला शिकवलं
जगाच्या पलीकडे
पहायला शिकवलं
गायला शिकवलं
नाचायला शिकवलं
ज्ञानाच्या सागरात
पोहायला शिकवलं
जे मला दिसत नव्हतं
ते गुरुजीनं दाखवलं
शिकवण्यापेक्षा शिकायचं कसं?
ते मला गुरूंनी शिकवलं
पुस्तक चाळायचे नाही
गाळायचे कसे शिकवलं
एकेक शब्दाचा मोती करून
माळायचे कसं शिकवलं
जात नाही ती
म्हणे 'जात' होय
कोणीच उतरवू शकत नाही
ती ज्ञानाची कात होय
कात काढून साप
जसा नवाकोरा होतो
ज्ञानाची कात चढून चढून
माणूस खराखुरा होतो
पणती आमची, वात आमची
उजेड मात्र तुमचा होता
बुद्धी आमची, कष्ट आमचे
मार्ग मात्र तुमचा होता
मी लोखंडाचा तुकडा
गुरुजी परीस बनून आले
ज्ञानाच्या स्पर्शानं
आयुष्याचं सोनं करून गेले
तुमच्यासारखाच मीही आता
आदर्श गुरुजी झालोय
पावलावर पाऊल ठेवून
ज्ञान वाटत चाललो
