माझे दादा

 बाप नावाच्या कल्पवृक्षाची  

 गोड फळे  आम्ही  चाखिली

 आयुष्यभर कष्ट उपसले आम्हासाठी

 स्वत:ची मात्र काया  झिजविली ...//१//   

 केले उच्च विद्या - विभूषित आम्हा

 शिक्षणाची होती फार आसक्ती  

 शिकाल तर टिकाल जगी 

 बिंबविली मनी आमुच्या ही उक्ती ...//२//

 कठोर झालात कधी, पण ते क्षणिक

 अंतरात  मात्र  माया प्रेम अपार 

 तुमच्या रागातच होते आमचे हित

 मनास होता भक्कम कणखर आधार ...//३//

 नोकरी  करून  मोठ्या  कष्टाने 

 वाढविले आम्हास देऊन सुसंस्कार 

 आईच्या  खंबीर साथीने आमुची 

 केली शिक्षणे - लग्ने, कर्तव्ये पार ...//४//

 प्रसंगी  घेतला  पोटास  चिमटा 

 आम्हा   पोटभर  मिळण्यासाठी 

 आधारस्तंभ, आश्वासक तुमचा हात 

 गरजा आमच्या सर्व पुरवण्यासाठी ...//५//

 येता संकट थोडेही  आमच्यावर

 उलघाल होई तुमच्याच जीवाची 

 मूर्ती प्रेमळ आत्मविश्वासाची

 खाण तुम्ही परोपकार नि आदर्शांची ...//६//