मृद्गंध दरवळ

आतुरता  पावसाची

तृषार्तली सारी सृष्टी

वाट चातका परीच

वर आकाशात दृष्टी ...//१//

काळ्या मातीचे शिवार 

सज्ज सरी झेलण्यास 

अति जाहले आतुर 

आभाळाच्या मिलनास..//२//

पहिल्याच पावसाचे 

पाणी देई मोद मनी 

चिंब चिंब होऊनिया 

भिजू सृष्टीसवे तनी ...//३//

झरे निर्मळ दुधाळ 

द-या, डोंगरी वहाती 

वृक्षवेली  आनंदली 

सुखावून ती नहाती ...//४//

शुभ्र प्रपात झोकात 

कडे पाषाण कपारी 

धाव उंचावरूनी ती 

वेग त्याचा मनोहारी ...//५//

जादुभरी सृष्टी भासे 

कोकिळेचे ते कुजन 

सुखावूनी आनंदात 

मयुराचे  ते  नर्तन ...//६//

निळाईच्या पार्श्वभूमी

तृण - पाती हिरवळ 

ओलसर   चराचर 

*मृदगंध   दरवळ* ...//७//