कोप प्रकोप
कोप प्रकोप
हल्ली
येत नाही ढगांना
खळखळून हसायला
भुई आतुरलीय थेंब टपोरे मिठीत घ्यायला
रोजचं होतं पोटूशी आभाळ
प्रसवपिडा ही ऐकू येते त्याची
पण प्रसवण्याआधीच पडतो दुपाव
उनाड वाऱ्याच्या
आघाताने
मग
पाण्यानं भारलेले ढग
पसार होतात गावच्या वेशी मधून
दिवसभरासाठी
येणाऱ्या दिवसांकडे
बोट दाखवून
निसर्गाच्या
या पोरखेळानं
बापाच्या चेहऱ्यावर आलेलं
चिंतेचं सावट स्पष्टपणे जाणवतं
त्याच्या कपाळाला पडलेल्या आठ्यांमधून
अचानक बांधावर आलेल्या सावकाराला पाहून
उगीचच घालमेल होते मग त्याच्या जीवाची
अन् त्याची भिरभिरणारी नजर जाते
येड्या बाभळीच्या झाडाला टांगलेल्या
एन्ड्रीन च्या डब्याकडे....!
पण...
त्याच क्षणी आठवतो त्याला
माझा निरागस चेहरा आणि
दररोज सकाळ संध्याकाळ
मणी मंगळसुत्राला डोळ्यांना व
मस्तकाला लावून देवाला
प्रार्थनारी माझी माय...!!
अन् मुसळधार बरसून जातात
त्याच्या पापणीत दाटलेलेले ढग...!!