कळवळल्याचे बळ

ती झुडपाच्या आडोशात मला भेटायची

पानांचा आधार घेत

थोडे शब्द बोलायची

ती बोलताना थोडा छळवादपणा करायची

हातात हात घेऊन

पुन्हा गळ्यात पडायची

रानामधी पिवळ्या पानांचा पुन्हा बोलबाला

पळसाच्या फुलातुनी

चिंब फाल्गुन रंगला

तिचे दूर दूर जाणे जड वैशाखी उन्हाला

तिच्या बाहुतली भेट

ओली श्रावण झडीला

तिच्या रुसल्याने रुसले आषाढी आभाळ

तिच्या डोळ्यातूनी गेले

काळ्या मातीला काजळ

काळ्या मातीला काजळ माझ्या काळजाला कळ

कळवळल्याचे शब्द

देते जगण्याला बळ