काव्यमय संवाद..

तो - अगं तुझी पापणी बघ

किंचित ओलसर आहे

रात्रीचा रुसवा बहुतेक

अजून ठाण मांडून आहे..

ती - खरंच काळजी करतोयस

कि नुसता आव आहे

रुसवा तुझ्यावर नाही

माझाच माझ्यावर आहे..

तो - अशी कशी तू सखे

किती भाबडी आहेस

मी स्वप्नी पाहिली

तशीच साजिरी आहेस..

ती - नको लावू लाडीगोडी

तू फार मतलबी आहेस

दिसतोस त्या पेक्षाही

खूप वेगळा आहेस..

तो - माझी बाहुली नेहमी

अशी शंका का घेते

राग गेला कि मग

पुन्हा माझ्याकडेच येते..

ती - मलाही नाही माहित

मी का तुझ्याकडे येते

माझ्या प्रेमाचा ठेवा

का तुझ्याच हाती देते..

तो - याचं कारण एकच

तुझा जीव गुंतलाय माझ्यात

तू कितीही नाही म्हण

हा वेडा रूतलाय तुझ्या काळजात..

ती - खरंच गुंतून गेलेय रे

वेड्या खोलवर तुझ्यात

स्वतःची अशी उरलेच नाहीये

आता मी माझ्यात..