झुंजूरका

(वर्ण संख्या - १६, यती - ८)

नाश करके अंधारो, आवं चवथो प्रहर |

ब्रह्म मुहूर्तकी बेरा, झुंजूरका मनोहर ||धृ||

योगी मुनी साधुसंत, जागसेती झुंजूरका |

सुरुवात करसेत, दिनचर्या ध्यानलका ||

पुजापाठ आराधना, भक्तीमय होयकर ||१|| ब्रह्म...

कोंबड़ाकी कुकडूकू, गुंज सकाळी सकाळी |

उठावसे सबलाच, जसो गायके भुपाळी ||

पाखरुकी किलबिल, झनकारं कानपर ||२|| ब्रह्म...

भुमसारो आंगनमा, होसे सड़ा सरावन |

मालकीन शिदोरीला, देसे ओला बांधकन ||

मंग चारोपाणी कर, जासे खेतं हलधर ||३|| ब्रह्म...

पहाटला उठकर, करे विद्यार्थी अभ्यास |

पक्की होसे याददास्त, भरं मनमा उल्हास ||

होसे सफल जीवन, ओको मंजील सुकर ||४|| ब्रह्म...

फिरो सकाळी सकाळी, पैदलच सबजन |

करो योग प्राणायाम, भेटे शुद्ध ऑक्सिजन ||

होये निरोगी शरीर, स्फूर्ती रहे दिनभर ||५|| ब्रह्म...

जुना फुलं पड़सेती, झुंजूरका तुटकर |

बेला, झाड़पर दिसं, नवो फुलको बहर ||

सुर्य चैतन्य सृष्टीमा, देसे लाली भरकर ||६|| ब्रह्म...