एक दिवा पेटवताना

आज खूप अवघड जातंय एक एक क्षण घालवताना

हात खूप थरथरत आहेत एक दिवा पेटवताना

ढगांचा गडगडाट रस्त्यावर पाणी मनात भरते धडकी पाण्याचा थेंब झेलताना

वाराही झाला आता सुसाट अडलाय समोर एक दिवा पेटवताना

पुढे काय होणार हेच मनात विचार मनात आता सलतोय हा मौसम मस्ताना

तेलाचेही आता पाणी झाले एक दिवा पेटवताना

हातात माचीसची पेटी आणि समोर रोखलेल्या प्रारब्धाचा नजराणा

हिरमुसला जीव आता झाला कासावीस एक दिवा पेटवताना

हौसमौज सारी थोडक्यात मिटू पाहतेय

पावसाची अलवार सर बेफिकीर होऊन बरसतेय

नाद तिचा थरारक आणि धास्ती मनाला

गुंफलेला वारा रूंजी घालतो एक दिवा पेटवताना

कोण कुठे आहे तर कोण कुठे भरलेल्या ढगांचा होतोय वारंवार नाद

वारा झाला आता शांत तरी पुढची वाट दिसेना

आता पाण्याचीही झाली अडचण एक दिवा पेटवताना

किर्र शांतता सभोवताली रातकिडंही अबोल झाली

केविलवाणी रात सारी झाली हळवी सलताना

काळरात्रही धास्तावली आज एक दिवा पेटवताना

हे संकट म्हणू दैवाचा रचलेला कट

मनही आता जास्त हळहळत आहे तेही फुकट

पुढे काय होणार याचा अंदाजच येईना

चाचरतंय आज मन एक दिवा पेटवताना