छंद

कला अंगणी चालला 

माझा जीवन प्रवास 

छंद मनास निराळे 

गोड त्यांचा सहवास 

चित्रकार होऊनिया 

कधी खुलवी मी रंग 

संगीताच्या स्वरामध्ये

मन राही सदा दंग

कधी जुळतात स्वर 

गीत उतरते ओठी

लयबद्ध ताण सारे

हर्ष राही मनाकाठी

कधी होऊनिया कवी 

साज शब्दरूपी पाही 

कधी क्रुर दुःखातून

सांडे लेखणीची शाही 

मानवाच्या हक्कासाठी 

लेख जन्मतो मनात 

विचारांचे बांध नवे 

इथे घडती क्षणांत

गोड जीवनात अशा

कमी कशाचीच नाही 

डोई राहो आशीर्वाद 

बाकी नको मज काही