बहरुनी वसंतात...

तू भेटण्यास आतुर व्हावे

असे शब्द मजला सुचावे

भावनांनी भुरळ घालावी

असेही कधी तरी घडावे

तुझ्या मनी इंद्रधनु उमटावे 

क्षितिजावर हिंदोळ्यात झुलावे

सप्तरंगी प्रीत छटा उधळावी

मी ही धुंद नभांगणी तरंगावे

मम ह्रदयी वसंत फुलताना

तव मोगऱ्या परी मोहरावे

अंतरंगी लावण्य खुलताना

पाकळी पाकळीतूनी दरवळावे

ऐक, कळले ना तुला सारे ?

मोरपिशी स्पर्शातूनी पुसावे

रोमरोमात उमलताना शहारे

निःशब्द होकारातूनी कळावे

अनुरागी रंगात रंगले पुरते

असे कधी तरी तर घडावे

प्रेमराग लालिमा पांघरूनी

आपण गुलाबी स्वप्न जगावे

🔸🔹🔸💠🔸🔹🔸🌿

      *स्वप्ना साधनकर*

             (मुंबई)