बाबा तुमची आठवण
बाबा तुमची आठवण
फादर्स डे असतो हे कळण्याच्याही आधीच
कितीतरी आधीच तुम्ही निघून गेलात बाबा
तुम्हालाही दिल्या असत्या आम्ही शुभेच्छा
तुमच्या चेहऱ्यावरचं वाचलं असतं कौतुक
बाबा तुम्ही होतात दिलखुलास व्यक्तिमत्व
आमचं जगणं आनंदी करणारे एक देवदूत
तुम्ही होता तोपर्यंत सुखाची सावली होती
जगाची झळ कधी सोसावी लागली नव्हती
सुखाची सावली आमच्या मस्तकी होती
उणीव, ददात आम्हाला जाणवत नव्हती
आत्ता quality time चं वारं खूप वाहतंय
पण तुम्ही तो भरभरून आम्हाला दिलात
छोट्याश्या वेळात तुम्ही खूप काही केलंत
कीर्तीरुपे उरण्यासाठी वेगळं काहीच नाही
जे केलंत ते कर्तव्याचं ओझंही न मानता
निरपेक्ष भावनेनं आपलेपणाच्या ओलव्यानं
कितीतरी लोकांच्या मनात आजही आहात
जगणं कोणाचं कोणासाठी थांबत नसतंच
पण ओंजळीतून निसटलेलं, ओघळलेलं
परत कधीच का आयुष्याला मिळत नसतं
तुमच्या देहाने आमच्यात असण्याशिवायही
मोठे होत गेलोच, जातोय की बाबा आम्ही
पण मनाने तर कधीच दूर नाही ओ तुम्ही
प्रत्येक यशाचा अन कौतुकाचा क्षण येतो
तुमचा आठव डोळ्यात नकळत तरळतो
तुम्ही असतात तर हा विचार मनात दाटतो
मनातला विचार मनात ठेवताना काय होतं
हे जगाला दाखवून न देणं असतं त्रासाचं
सावरलो आहे हे दाखवताना वरवरचं
आतून तुटणं काय असतं ते अनुभवलं
आहे हे आयुष्य छान आहे स्थिर आहेच
पण तुम्ही असतात तर नक्की उत्तम असतं
फादर्स डे निमित्त आठवणींना उजळण्याचं
मनात तुम्ही कायमच आहात आणि रहाल