"अनोखी ही नाळ मैत्रीची"
"अनोखी ही नाळ मैत्रीची"
'मैत्री' एक अतूट नातं हळुवार जपलेलं,
निःस्वार्थपणे ते आपलसं झालेलं||
मैत्री भरकटलेल्या पाखराला योग्य वाट दाखवणारी,
सुकलेल्या फुलांना बहर आणणारी||
मैत्री जी कशी हळुवार उमलते,
उन्हातही मग सावली वाटते||
अश्रूत दुःख वाहून जाते,
अन् व्यथांनाही हसू येते||
दुःखाच्या वाळवंटात प्रेमाचा पाझर आणणारी मैत्री,
एकटेपणात सहवासाचा दिलासा देणारी मैत्री||
शब्दाविणा सर्वकाही समजून घेणारी ,
न सांगताच डोळ्यातील भाव ओळखणारी ||
मैत्री असते पहाटेच्या दवासारखी थंडगार स्पर्श करणारी,
मैत्री असते केवड्यासारखी तना - मनात सुगंध पसरविणारी||
सूर्योदयासारखी मनाला नवचैतन्य देणारी,
झाडासारखी उन्हात राहून सावली देणारी||
मैत्री असते सोन्यासारखी तावून सुलाखून चमचमणारी,
हिऱ्यासारखी पैलू पडताचं लखलखणारी ||
ती असावी पहाडासारखी गगनाला भिडणारी,
समुद्रासारखी तळाचा थांग नसणारी||
एक सुंदर प्रवास पावसांच्या सरींचा,
एक सहवास जणू अलगद पडणाऱ्या गारांचा||
मैत्री म्हणजे नेमकं काय असतं?
एकमेकांचा विश्वास का अतूट बंधन असतं?
मैत्री म्हणजे मैत्री असते,
व्याख्या नाही तिच्यासाठी||
अतूट बंधन नव्हे तर
असतात त्या रेशीमगाठी||