आयुष्य

आयुष्य हाच एक प्रवास

आदीकडून अनंताकडे‌|

अशाश्वत अशा जगाकडून 

नेतो शाश्वत जगताकडे||१|| 

सुख-दुःख, आशा-निराशा

यश-अपयश येती ठिकाणे‌|

मुक्काम येथे काही क्षणांचा

प्रवास करावा क्रमाक्रमाने||२||

नाती-गोती, मित्र-मंडळींना

जावे लागते भेटायला गावी|

नोकरी, धंदा वा जिविकेसाठी

पर्यटनस्थळेही वाटती पाहावी||३||

मिळवून देई कधी मनस्वी आनंद 

कधी मनस्ताप नि जास्त दगदग|

तरीही प्रवास हा लागतोच करावा 

जीवाची होण्या दूर ती तगमग||४||

काहींसाठी असे छंद ही भटकंती

देश विदेश पर्यटनाची नामी संधी| 

'माझे घर हेच विश्व' मानणाऱ्यांना

घालावी वाटते पर्यटनावरच बंदी||५||