आई असते स्त्री
आई असते स्त्री
आईचं अस्तित्व समजून
घेण्यासाठी घे ना स्री जन्म |
तेव्हाच कळेल तुला तिचे
आजवरचे भोग आजन्म | |१| |
किती दिव्यातून येते ती जन्मा
गर्भात चुकूनच कधी वाचली तर |
स्रीच्या नशिबात असते क्वचितच
कन्याजन्म स्वागत करणारे घर | |२| |
आईचं अस्तित्व टिकविण्यासाठी
तिलाच करावा लागेल संघर्ष |
पुरुषी अहंकार,जाचाला तोंड
देऊनच करु पहातेय ती उत्कर्ष | |३| |
तिचं अस्तित्व तिलाच तरी कुठे
होते पुर्णपणे जराही उमगलेले ?
शिक्षणाच्या प्रवाहापासून दूर स्री
होती कळसुत्र बाहुलं बनवलेलं | |४| |
आई सुज्ञ होऊन जपू पहातेय
तिची अस्मिता अस्तित्व टिकवून |
शिकून स्वतःच शिकवतेय मुलींना
नकारात्मक अंधश्रद्धांना मिटवून | |५| |