आगमन पावसाचे

उन्हाचे झाले रुपांतर सावलीत 

उष्णतेचे झाले गारव्यात परिवर्तन

कळलेच नाही कसे अचानक 

पावसाने घेतले भूईचे चुंबन ||

लागली होती चाहूल त्याची 

पण वाटले पडेल कधीतरी 

येउन दिला सुखद धक्का

सामावून त्यात भिजले मी पुरी ||

ओल्या मातीचा पसरला दरवळ 

अलगद पानांनी छेडले फुलांना 

कळला इशारा फुलांना देखील 

येणार बहर कोमेजल्या कळ्यांना ||

तळी साठली नदीही खुलली 

संपली प्रतिक्षा शेतकऱ्यांची 

शेतात लागली रोपे कुजबुजू 

आली वेळ आपली बहरण्याची ||

चहूकडे हिरवळ पसरे मखमली

फुलपाखरे रंग उधळती 

स्वागत करती एकजुटीने

पावसाच्या आगमनाने नाती बहरती ||