ആനി ഭാഗം 3

                        

                

ആകാംക്ഷയോടെയുള്ള ഡോക്ടറുടെ ചോദ്യത്തിന് ആനിയിൽ നിന്ന് മറുപടി താമസിച്ചു.

ആനിയുടെ കണ്ണുകൾ പൊടുന്നനെ നിറഞ്ഞൊഴുകി . വല്ലാത്ത സംഘർഷം അനുഭവിക്കുന്നുണ്ടെന്ന് ആനിയുടെ മുഖത്തു നിന്നും ഡോക്ടർക്ക് മനസിലായി.

" ചേച്ചീ.. ചേച്ചീ.. ആർ യു ഓക്കെ "

" യെസ് ഡോക്ടർ.. "

"ചേച്ചീ ..അതാ അവിടാണ് വാഷ്റൂം പോയി മുഖമൊന്നു കഴുകി ഫ്രഷ് ആകൂ." ഡോക്ടർ പറഞ്ഞു.

" താങ്ക്യൂ ഡോക്ടർ ..എൻ്റെ മനസ്സ് അറിഞ്ഞുപറഞ്ഞതിന് ." ആനി ഡോക്ടർ ചൂണ്ടിക്കാണിച്ച ഭാഗത്തേയ്ക്ക് നടന്നു.

നീളമുള്ള വരാന്തയുടെ അങ്ങേ അറ്റത്താണ് വാഷ്റൂം . വാഷ്റൂമിലെത്തിയ ആനി .ടാപ്പ് തുറന്നു വിട്ട് പൊട്ടിപ്പൊട്ടിക്കരഞ്ഞു.

" അശോക് നീ ഇനി മറ്റൊരാളുടെതാവാൻ പോകുന്നു. നമ്മൾ ഒന്നിച്ചുകണ്ട സ്വപ്നങ്ങൾ ഒക്കെ . എന്തിനാണ് ഈശ്വരാ നീ എന്നെ ഇങ്ങനെ ശിക്ഷിക്കുന്നത്. "

ആനി വേഗം മുഖം കഴുകി തിരിച്ചെത്തി.

" ഡോക്ടർ .. എനിക്കു തന്ന സമയം കഴിഞ്ഞോ.. "

" ഇല്ല ചേച്ചി ..ഇന്നിനി ഞാൻ ഹോസ്പിറ്റലിൽ പോകുന്നില്ല. ചേച്ചിക്ക് പറയാനുള്ളത് മുഴുവൻ കേൾക്കണം .. ഇനി പറഞ്ഞോളൂ.. അശോക് കാവ്യയുടെ അടുത്ത് പോയോ..?

" പോയി .. ഡോക്ടർ . അശോകിനെ അവളുടെ അച്ഛനും അമ്മയ്ക്കും ഇഷ്ടമായി. അശോകിനെ കണ്ടപ്പോൾ അവൾ ഓക്കെ ആയി . എന്നാലും മനസ് വിഷമിക്കാൻ പാടില്ല . ഇപ്പോൾ അവരുടെ കല്യാണം നടത്തണമെന്നാണ് കാവ്യയുടെ വീട്ടുകാർ പറയുന്നത്. അവരുടെ തിരുമാനം കാവ്യയ്ക്ക് പുനർജന്മം പോലായി .

" ഇതറിഞ്ഞ അശോക് പറയുന്നു അവൻ അവളെ രക്ഷിക്കാൻ വേണ്ടിയാണ് പോയതെന്ന്. അല്ലാതെ പെണ്ണുകാണാനല്ലെന്ന്. അവൾ ഓക്കെ ആയി ഇനി അവൾക്ക് കുഴപ്പമൊന്നും വരില്ലെന്ന്. "

" പക്ഷെ എനിക്കറിയാം ഡോക്ടർ അവൾക്ക് അശോക് ഇല്ലാതെ ജീവിക്കാൻ പറ്റില്ലെന്ന്. അശോക് വിവാഹത്തിന് സമ്മതിച്ചില്ലെങ്കിൽ ഉറപ്പായും കാവ്യ പിന്നെ ജീവിച്ചിരിക്കില്ല . അശോകിന് കുറ്റബോധം ആണ്. അപ്പോൾ കാവ്യ എന്തെങ്കിലും ചെയ്താൽ .. അതു പാടില്ല ഡോക്ടർ .ഞാനാണ് അവർക്കിടയിൽ നിന്നും പോകേണ്ടത്. അവരെ ഞാൻ അത്രയ്ക്കും ഇഷ്ടപ്പെടുന്നുണ്ട്. അശോക് എൻ്റെ ജീവിതം ആണ്. എന്നാലും. അവർ ഒന്നാകട്ടെ. ".

" അവരുടെ ജീവിതത്തിൽ നിന്ന് ഞാൻ പോയേപറ്റൂ ഡോക്ടർ... അശോകിൻ്റെ മുന്നിൽ എനിക്ക് പിടിച്ചു നിൽക്കാൻ ആവില്ല . അശോക് ഇനി എൻ്റെ മനസ്സിൽ കാവ്യയുടെ ഭർത്താവ് മാത്രം ആകണം .. എൻ്റെ മനസ്സിൽ ഇനി അശോക് ഉണ്ടാകാൻ പാടില്ല. ആ ഓർമ്മകൾ എന്നിലും ഉണ്ടാകരുത്. എൻ്റെ കൺമുന്നിൽ അവർ ജീവിക്കുന്നത് എനിക്ക് സഹിക്കാൻ പറ്റാതെ വന്നാൽ ... കാവ്യ മാത്രം മതി എൻ്റെ മനസ്സിൽ . അവളുടെ ഭർത്താവ് മാത്രം ആകണം എനിക്ക് അശോക് . ഡോക്ടർ സഹായിക്കില്ലേ.. "

ഡോക്ടർ ആനിയെ തന്നെ നോക്കി ഇരുന്നു. ഒന്നും പറഞ്ഞില്ല. " ഇങ്ങനെയും ഉണ്ടോ ആളുകൾ. ഇവർക്ക് തന്നെക്കാൾ രണ്ടു വയസ് കൂടുതൽ ഉണ്ടാവാം . സ്വന്തം ജീവിതം ആണ് കൂട്ടുകാരിക്കുവേണ്ടി വേണ്ടാന്നു വയ്ക്കുന്നത്. ഈ ലോകത്ത് ഇങ്ങനെ ഉള്ളവർക്ക് എന്നും വേദനകൾ മാത്രേ പ്രതിഫലമായി കിട്ടുകയുള്ളൂ. പാവം ." ഗ്രീഷ്ന ചിന്തിച്ചു.

" ഡോക്ടർ.. ഡോക്ടർ.. പറയൂ എന്നെ..എന്നെ സഹായിക്കില്ലേ.. "ആനി ദയനീയമായി ചോദിച്ചു.

" ചേച്ചീ... അശോക് . കാവ്യയെ വിവാഹം ചെയ്യുമെന്ന് ചേച്ചിക്ക് ഉറപ്പുണ്ടോ... ചേച്ചി കരുതുംപോലെ നടന്നില്ലെങ്കിൽ..?

" നടക്കണം ഡോക്ടർ. അതിനാണ് ഞാൻ ഇവിടെ വന്നത് . "

" ഓക്കെ ..സഹായിക്കാം .ആദ്യം എനിക്ക് അശോകിനെ കാണണം.സംസാരിക്കണം . അശോകിൻ്റെ നമ്പർ തരൂ. "

" നോ..ഡോക്ടർ .ഞാൻ ഇവിടെ വന്നത് ആരും അറിയാൻ പാടില്ല. അശോക് അറിഞ്ഞാൽ സമ്മതിക്കില്ല. "

" നമ്പർ തരൂ.. നിങ്ങളാണ് തന്നതാണെന്ന് പറയില്ല. "

" പക്ഷെ ഞാൻ ഇവിടെ എന്തിനാണ് വന്നതെന്ന് പറയരുത്."

" ഇല്ല ..എന്നെ വിശ്വസിക്കാം . "

" യേസ് ഡോക്ടർ ഇതാണ് അശോകിൻ്റെ നമ്പർ ".

" ഓക്കെ ഞാൻ വിളിക്കുമ്പോൾ വരണം "

" വരാം ഡോക്ടർ ."

" ഞാനിപ്പോൾ വരാം ... " ഡോക്ടർ എണീറ്റ് അകത്തേക്ക് പോയി.

പെട്ടെന്നുതന്നെ തിരിച്ചെത്തി .തിരിച്ചെത്തിയ ഡോക്ടറുടെ കയ്യിൽ ഒന്നുരണ്ടു കവറുകൾ ഉണ്ടായിരുന്നു. കയ്യിലിരുന്ന കവറുകൾ ആനിക്കു നേരെ നീട്ടി.

" ചേച്ചീ..ഈ ഗുളിക രാത്രി ഭക്ഷണത്തിനുശേഷം മാത്രം കഴിക്കണം .ഓക്കെ . മറ്റേത് രാവിലെ .."

" ഡോക്ടർ ..ഞാൻ നിങ്ങളെ വിശ്വസിക്കുന്നു."

" ഗുഡ് . ചേച്ചീ.."

ആനിയുടെ മുഖത്ത് ചെറിയ ചിരി വിരിഞ്ഞു. ഒരുമാത്രനേരമേ ..ആ സന്തോഷം നിന്നുള്ളു.വീണ്ടും പഴയപോലെ മുഖത്ത് സങ്കടം പ്രകടമായി .

" ബൈ ഡോക്ടർ. "ആനി യാത്ര പറഞ്ഞിറങ്ങി.

          °°°°°°    °°°°°°    °°°°°°

കാവ്യ ലീവായതിനാൽ റൂമിൽ ആനി ഒറ്റയ്ക്കേ ഉള്ളൂ. ഭക്ഷണത്തിനുശേഷം ഡോക്ടർ തന്ന ഗുളിക ആനി കഴിച്ചു കിടന്നു. 

" ഡോക്ടർ അശോകിനെ കാണണം എന്നു പറഞ്ഞത് എന്തിനാവും " ആനിക്ക് ..കൂടുതൽ ചിന്തിക്കാനായില്ല . ഉറക്കം വന്ന് കൺപോളകൾക്ക് ഘനംവച്ചു . ശ്വാസം നേർത്തുനേർത്തു വന്നു..അന്ന് ദിവസങ്ങൾക്കുശേഷം ആനി സുഖമായി ഉറങ്ങി.

" ഒന്നു വേഗം വാ ആനീ ." .അശോക് ധൃതികൂട്ടി.

" വരുന്നു .. എന്തിനാ ഇത്രസ്പീഡിൽ പോകുന്നത്. എനിക്ക് ഓടാൻ വയ്യ." ആനി കിതച്ചുംകൊണ്ട് പറഞ്ഞു.

" എടീ പെണ്ണേ നീ നടക്കേണ്ട വഴിയാ..നിനക്കു നടക്കാൻ പറ്റില്ലാന്നുപറഞ്ഞ് വീടുമാറാൻ പറ്റുമോ.. ഇപ്പോഴേ നടന്നും ഓടിയും ശീലിക്ക് .അത് നമുക്ക് ഗുണം ചെയ്യും . "

" ഞാൻ ഓടുന്നതും നടക്കുന്നതും കൊണ്ട് എന്തു ഗുണം ഉണ്ടാവാനാ ..എൻ്റെ തടികുറയ്ക്കാനോ..ഇനിയും മെലിഞ്ഞാൽ കാണാൻ ഒരു ചന്തവും ഉണ്ടാവില്ല. "

" നിന്നെക്കൊണ്ട് തോറ്റു. നീ മെലിയുന്ന കാര്യമല്ല. നമുക്ക് ഒളിച്ചോടേണ്ടേ..അല്ലാതെ നിൻ്റെ വീട്ടുകാർ കെട്ടിച്ചു തരില്ലല്ലോ.."

" ഒളിച്ചോടാനൊന്നും എന്നെകിട്ടില്ല. ആദ്യം മാന്യമായി എൻ്റെ വീട്ടിൽ വന്ന് പെണ്ണുചോദിക്ക് .. "

" നിനക്ക് വികലാംഗപെൻഷൻ വാങ്ങാൻ ആണ് ആഗ്രഹം അല്ലേ..?

" പെണ്ണുകാണലും വികലാംഗപെൻഷനുമായി എന്തു ബന്ധം..?

" ബന്ധമുണ്ടോന്നോ.. ഉണ്ട്. പെണ്ണുചോദിക്കാൻ നിൻ്റെ വീട്ടിൽ വന്നാൽ അവർ എൻ്റെ കാലുതല്ലിയൊടിക്കും .അച്ചായമ്മാരുടെ വീട്ടിൽ നായരുചെക്കൻ പെണ്ണുചോദിച്ചു ചെന്നാൽ ബാക്കി എന്താവും സംഭവിക്കുകയെന്ന് പറയണോ .."

" അങ്ങനൊന്നും സംഭവിക്കില്ല. "

" അങ്ങനെ സംഭവിച്ചാലോ..എൻ്റെ ആനീ

നിൻ്റെ വീട്ടുകാരിൽനിന്ന് രക്ഷപെടാൻ ഓടേണ്ടിവരും . "

" അത് അപ്പോഴല്ലെ... ഞാൻ മടുത്തു .

ഇപ്പോൾ എനിക്കൊന്ന് ഇരിക്കണം ."

" ഞാൻ പറഞ്ഞതല്ലേ നിന്നോട് ബൈക്ക് എടുക്കാമെന്ന് ..അപ്പോൾ സമ്മതിച്ചില്ല. "

" ബൈക്കിൽപോയാൽ ഇങ്ങനെ സംസാരിക്കാൻ പറ്റുമോ.. ഇങ്ങനെ കിന്നാരം പറയണേൽ ഇതാ നല്ലത്."

" നീ പറഞ്ഞതും ശരിയാ..എന്നാൽ നമുക്ക് ഇന്നുതന്നെ ഒളിച്ചോടിയാലോ .. " അശോക് ചോദിച്ചു.

" സമയമായില്ല ..ആകുമ്പോൾ പറയാം .."

" നിനക്ക് സമയം ആകുമ്പോൾ എന്നെ കിട്ടിയെന്നു വരില്ല. നീ മാത്രമല്ലോ പെണ്ണായിട്ട് ".

പിന്നെ ക്യൂ നിൽക്കയല്ലേ പെണ്ണുങ്ങൾ.

ഇതാണ് മനസ്സിലിരിപ്പ് അല്ലേ.. " ആനിയുടെ കണ്ണുനിറഞ്ഞു.

" ഭാവം മാറിയല്ലോ ..എൻ്റെ ആനിക്കൊച്ചേ..നമുക്കിടയിൽ ആരും വരില്ല . നീയും ഞാനും നമ്മുടെ മക്കളും അതാണ് നമ്മുടെ ലോകം . അശോക് ആനിയുടെ കണ്ണുനീർ തുടച്ചു.

" അശോക്  ..അരുത് .. എന്തായീ കാണിക്കുന്നത് ." ആനി ഞെട്ടിപ്പോയി. പരിചയമുള്ള സ്ത്രീശബ്ദം . അവർ അശോകിൻ്റെ കയ്യിൽ പിടിച്ചു.

          തുടരും....