യാത്ര ചോദിക്കുന്ന സമയം

യാത്ര ചോദിക്കുന്ന യാമങ്ങളിൽ

ഒരു രാത്രി കൂടി ഞാൻ കൂട്ടിരിക്കാം

ഒരു പകൽ കൂടി ഞാനോർത്തിരിക്കാം

വിട പറയുന്നതിൻ മുൻപു തന്നെ

എത്ര മനോഹരമോർമകളിൽ

നിൻ തൂമന്ദഹാസം വിടർന്നിരുന്നു

അഷ്ടൈശ്വര്യങ്ങൾ പകർന്നു നൽകും

ദേവിയായ് മനസ്സിൽ നീ കുടിയിരിക്കെ

ഒരു മൗനഭാവം തിരഞ്ഞെടുപ്പിൽ

നിന്നിൽ കരിനിഴലായി പടർന്നിരുന്നോ

അക്ഷരത്തെറ്റുകളില്ലാതെ നാം

എഴുതുവാൻ ശീലിച്ച നാൾ മുതൽക്കെ 

നീയെന്നുമെൻ മനസ്സിലുണ്ടായിരുന്നു

നീയെന്നുമെൻ കൂട്ടിനുണ്ടായിരുന്നു

നീയറിയുവാൻ വൈകിയതായിരുന്നോ

ഞാൻ പറയുവാൻ മടിയോടെ നിന്നതാണോ

ചികയുവാൻ സമയമില്ലെങ്കിലും നാം

വഴി പിരിഞ്ഞീടുവാൻ സമയമാകെ 

ഓർമ്മകളഗ്നിയായ് പടർന്നിറങ്ങും

ഈ യാമത്തിൽ യാത്ര ചോദിക്കട്ടെ ഞാൻ