എന്നെന്നുമെന്നും

ഇനി വരും കാലം കൂടെ നീ വേണം 

ഇനിയെന്നുമെന്നും കൂട്ടായി വേണം 

തിരയടിച്ചുയരുന്ന സങ്കടക്കടലിൽ 

പവിഴപ്പൊൻമുത്തായരികത്തു വേണം 

മിഴി രണ്ടുമേറെ പെയ്തിറങ്ങുമ്പോൾ 

പേമാരിയായി നിന്നിൽ ലയിക്കണം 

കാൽപ്പെരുമാറ്റം കേൾക്കുന്ന നേരം 

കാത്തിരിപ്പിന്റെ കരുതലാകേണം 

പ്രത്യാശ തൻ വിഹായസ്സിലെങ്ങും 

നീയെന്റെ മനസ്സിന്റെ ചിറകായിടേണം

അതിർവരമ്പുകളില്ലാതെ രാപ്പകൽ 

നിന്റെ ഹൃത്തിന്റെ സ്പന്ദനമാകണം 

പ്രായമേറെയങ്ങേറുന്ന കാലത്ത്  

നിൻ മടിത്തട്ടിലെന്നും മയങ്ങണം 

ആറടി മണ്ണിൽ ഞാനണയുമ്പോൾ 

അവസാന യാത്രയയപ്പു നൽകേണം