നിസ്സംഗത
നിസ്സംഗത
ക്ലോക്കിലെ സൂചികൾ
ഇളകി വീഴുന്നു
ടപ് sപ് സ്പന്ദനം
മാത്രം മുഴങ്ങുന്നു
ഇരുൾ പരത്തിയ മേഘങ്ങൾ
നാഴിക വിനാഴികകളെ
മറയ്ക്കുന്നു
തെരുവുവിളക്കുകൾ
കണ്ണടയ്ക്കുന്നു
കാലമറിയാതെ പോയൊരു
കാലൻകോഴി കൂവുന്നു
ഉറക്കം മറന്ന മുത്തശ്ശി
ആരുടെയോ തെറ്റുകുറ്റങ്ങൾ പറഞ്ഞ്
കാറിത്തുപ്പുന്നു
കുമ്പസാരക്കൂട്ടിൽ
പശ്ചാത്താപം നെടുവീർപ്പിടുന്നു
വധശിക്ഷയ്ക്കു വിധിക്കപ്പെട്ട
കുറ്റവാളി
പൊട്ടിച്ചിരിക്കുന്നു
ആരാച്ചാർ
കുടുക്കിൻ്റെ ബലം പരീക്ഷിക്കുന്നു
നിസ്സംഗതയുടെ പ്രഭാതം
വീണ്ടും പുലരുന്നു
കണ്ണീരും വിരഹവും
തുടർക്കഥയാവുന്നു...