അപരിചിത
അപരിചിത
കരളിനുള്ളിലുറഞ്ഞ സ്വപ്നം
കതിരിടാതെ മിഴി നിറക്കുന്നു
മൊഴി മറന്ന പ്രണയശലഭം
പഴയ വർണ്ണം കൈവെടിയുന്നു
ഇരുൾ പടർത്തി ഇല പൊഴിച്ചു
മൗനമോ വിസ്മൃതിയിലാളുന്നു
ജലമുറഞ്ഞ നദിയോരമിന്ന്
പുതുമഴക്കായ് തപസ്സിരിക്കുന്നു
ശിരസ്സറുത്ത പൂവുകൾ തൻ
നിണമണിഞ്ഞു ജീവനുരുകുന്നു
ചിറകു രണ്ടും പടരുമഗ്നിയിലാ-
കാശമകലെ കൺമറയുന്നു
ചടുലനൃത്തച്ചുവടു തെറ്റി
ചതുപ്പുനിലത്തിൽ വീണടിയുന്നു
പതിതഗാനം പാടിയകലും
മേഘമായ് ഞാൻ ദൂരെ മായുന്നു
നഗരവീഥിയിൽ അപരിചിതയായ്
നിൻ കിനാവും മുഖവുമകലുന്നു
കാലമിന്നൊരു ചൂണ്ടയിൽ
ഹൃദയം കൊളുത്തി വലിക്കുന്നു