ಜತೆಗಿರಲು ನೀನು...
ಜತೆಗಿರಲು ನೀನು...
ಗಡ್ಡ ಬಿಳಿಯಾಯ್ತು
ಕೂದಲು ನೆರೆತಾಯ್ತು
ಮನಸ್ಸು ಪಕ್ವವಾಯಿತು
ದೇಹಕ್ಕೆ ದಣಿವಾಯಿತು
ಆದರೆ ಜೀವಕ್ಕೆ ಜತೆ ನೀನು
ಇಷ್ಟೊಂದು ವರುಷ
ನಡೆದು ಜತೆಯಲ್ಲಿ
ಕಲ್ಲು, ಮುಳ್ಳಿನ ಹಾದಿಯಲ್ಲಿ
ಜೀವನದ ಸಂಕಷ್ಟಗಳಲ್ಲಿ
ಜತೆಯಾಗಿ ಹಗ್ಗ ಎಳೆದು
ಬದುಕಿನ ಬಂಡಿ ಸರಿಯಾದ ದಾರಿಯಲಿ
ಎಳೆದೆಳೆದು, ಸುಸ್ತಾಗಿ
ಇಟ್ಟಾಗ ನಿಟ್ಟುಸಿರು
ಇದ್ದೆ ಪಕ್ಕದಲ್ಲಿ ನೀನು,
ನನ್ನೆದೆಯ ಮಿಡಿತದಲ್ಲಿ
ನಿನ್ನ ಹೆಸರು, ಯೋಚನೆ
ಹರೆಯದ ಆ ಗುಂಗು
ಇನ್ನೂ ಹಸಿ,
ಆಗಲೇ ಕವಿಯಿತಲ್ಲ
ಜೀವನ ಸಂಜೆ
ಮುಳುಗುತ್ತಾ ಬಂದ ಸೂರ್ಯ
ಆವರಿಸುತ್ತಾ ಬಂತು ಕತ್ತಲು.
ಹೆದರಿದೆ ಮನ
ನಡುಗಿದೆ ತಾನು
ಆವರಿಸಿದೆ ಭಯ
ಮನದಲ್ಲಿ, ನಾಳೆಯ ಬಗ್ಗೆ.
ಈ ಕ್ಷಣ ಜತೆಗಿದ್ದೀವಿ
ಮುಂದೇನೋ, ಹೇಗೋ!
ಜತೆಗೆಗೂಡಿ ಹೆಜ್ಜೆ ಹಾಕಿದ
ದಿನಗಳ ನೆನಪು
ಕೂಡುತ್ತಿದೆ ಕಣ್ರೆಪ್ಪೆಯಲ್ಲಿ
ಜತೆಗೆ ಇರೋಣ
ಸಾಗೋಣ ಆದಷ್ಟು
ದಿನ, ಒಟ್ಟಿಗೆ...ಖುಷಿಯಾಗಿ!!