ಏಕಾಂಗಿ ನೀನಲ್ಲ
ಏಕಾಂಗಿ ನೀನಲ್ಲ
ಮೌನವೇಕೆ ಚೆಲುವೇ
ನಿನ್ನೊಲವೆ ನನಗೆ ಚೇತನ ||
ಜೀವನದ ಹಾದಿಯಲ್ಲಿ ನಾನಿನ್ನ ಜೊತೆಯಾದೆ
ಬಯಸದೆ ನೀ ಬಂದೆ ಸಂಗಾತಿಯಾದೆ
ಬಣ್ಣದ ಚಿತ್ತಾರ ಬದುಕೆಂದು ಅರಿಯೋಣ
ಒಲವಿನ ಲೋಕದ ಆಂತರ್ಯ ಅರಿಯೋಣ
ಬಣ್ಣಕೆ ಸೋಲದೆ ಒಂದಾಗಿ ನಡೆಯೋಣ ||
ನೀ ಕಂಡ ಕನಸುಗಳೆಷ್ಟೋ ನಾನರಿಯೆ ನನ್ನಾಣೆ
ನಾ ಕಂಡ ಕನಸುಗಳನ್ನು ನೀ ತಿಳಿಯೆ ಓ ಜಾಣೆ
ಮನಬಿಚ್ಚಿ ನೀನು ಆಡು ಸವಿ ಮಾತೊಂದ
ಮನಸಾರೆ ಕೇಳಿ ಹೊಂದುವೆನು ಮೋದ
ನಂಬಿಕೆ ಅರಳಲು ಸೌಗಂಧ ಜೀವನ ||
ಈ ನಿನ್ನ ಮೌನದಲ್ಲಿ ಏನರ್ಥ ಅಡಗಿದೆಯೋ
ಒಗಟಾಗಿ ಇಡಬೇಡ ಹೇಳಿದರೆ ಹಗುರಮನ
ಒಲವಿನ ಬಾಳಿಗೆ ನೀನಿರದೆ ಗೆಲುವಿಲ್ಲ
ಮುರಿ ಮೌನ ಮಾತನಾಡು ಮರೆತೀಗ ಎಲ್ಲ
ಏತಕೆ ಕಂಬನಿ ಏಕಾಂಗಿ ನೀನಲ್ಲ ||